SDCA ten Bawrhsap-ah thlen

Serchhip District Consumer Association (SDCA) hruaitute chuan nimin khan Serchhip DC Paul L. Khuma chu hmuin Serchhip-a ATM hmangtu thenkhat ten harsatna an tawh chungchang an sawipui.
Serchhip District Consumer Association hruaitute hian tunhnaia mipui lam atanga an thu hriat bawhzuiin Serchhip Bawrhsap hi hmuin, Serchhip Tuikhuah Veng-a Punjab National Bank ATM hmangtuten harsatna an tawk thin nia an hriat thu leh mipui ten harsatna an tawh zui loh nan a tul anga hmalaksak turin Bawrhsap hi an ngen a, an ngenna hi ziakin an thlen nghal bawk a ni.

Serchhip District Consumer Association te chuan Serchhip Tuikhuah Veng ATM atanga pawisa lak tumte pawisa hi a tang fo thin nia sawiin, heng pawisa tang te hi thenkhat chu tun thlengin hmuh let a la nilo niin an sawi a, ATM a pawisa lakchhuah tum ten an Card hmanga transaction engkim an tih fek vek tawh hnuah current chian loh avangin khawl a thi thut a, an pawisa chu a tang ta thin niin an sawi a. Bank lama an thlenin an harsatna an chinfel sak hleithei thin lo tih sawiin, hemi kaihhnawihah hian tunhnaiah Serchhip Consumer Court-ah pawh thubuai 2 a lut tawh tih an sawi a. Hetianga ATM hmangtuten harsatna an tawk fo mai chu tha lo an tih thu sawiin, he harsatna hi sutkian a nih theihna turin Bawrhsap hnenah hian an thlen a ni.