Kum 6 chhungin lirthei chesual a thi 465 an awm

Mizoram-ah tunhnai kum ruk chhungin lirthei chesuala thi mi 465 an awm a, hemi kum ruk chhung hian kum 2022 kha lirthei chesuala thi awm tam ber kum niin zirchianna atanga a lan danin khaw that (sunny/clear) laia lirthei chesuala thi an tam bawk.

Mizoram Police chhinchhiah danin kum ruk kalta chhunga lirthei chetsualna thlenga thihna thlen dan chu kum 2019-ah lirthei chesuala thi mi 48 an awm a, kum 2020-ah mi 42, kum 2021-ah mi 56, kum 2022-ah mi 113, kum 2023-ah mi 96 leh kum 2024-ah mi 110 an ni. Nikum (2024) chhung khan January-ah lirthei chesuala thi mi pakua an awm a, February-ah pasarih, March-ah 16, April-ah 12, May-ah pakua, June-ah pasarih, July-ah paruk, August-ah pariat, September-ah pasarih, October-ah pali, November-ah 11 leh December-ah 14 an awm.

Mizoram Police-in lirtheia chetsual hun an zirchianna atanga a lan danin, tunhnai kum ruk chhunga lirthei chesuala thi mi 332-te chu khaw that lai (sunny/clear)-a chesual an ni a, mi dang 133-te chu ruahsur lai/chhum zing etc. laia chesual an ni. Lirtheia chetsualna a tlem theihna turin sawrkar laipui chuan Motor Vehicle Act dan bawhchhia a ngai thutak hle tawh a, Head Constable chinte chu dan bawhchhiate man mai ni lo, pawisa chawitir theihna thuneihna pek an ni tawh a. Licence nei lo, kumtlinglo lirthei khalh mante chu a khalhtu ni lovin a khalhtu nu leh pate hrem theih an ni tawh bawk a. Hei bakah hian kum khat chhung vehicle license registration cancel-sak theih an nih bakah Rs 25,000 thleng chawitir theih an ni.