Sawrkar laipui scheme kalpuina ah VC inel dawn

Nimin khan Saitual-ah District Evaluation Committee chu thukhawmin Sawrkai laipui Scheme hrang hrang kalpuina kawnga VC te intihsiakna tur chungchang an ngaihtuah.

Saitual Bawrhsap Dr. Lalngura Tlau hova thutkhawm DC Conference Room-a neih ah hian Bawrhsap chuan Sawrkar laipui chuan mipuite hamthatna tur Scheme tha tak tak a duang thin tih sawiin, heng Scheme te hi a dawng tur dik tak te hnena a thlen theih nan Village Council ti tha ber te chu Sawrkar laipui chuan lawmpuina a hlan dawn tih a sawi a. Hei hi Good Governance atana Sawrkar laipui hmalakna a nih angin Line department te chu an Scheme chan theuha hamthatna diltute chu en zuia, a changtu tur ten an chan ngei theih nana hma la turin a fuih nghal a ni.

Saitual District-a Village Council 46-ah heng Scheme 9- Har Ghar Jal Yojana, Pradhan Mantri Awas Yojana (Gramin), PM Vishwakarma Yojana, Mission Indranush, Pradhan Mantri Matru Vandana Yojana (AB PM-JAY), Saksham Anganwadi and Poshan 2.0, Kisan Credit Card Scheme (Farmers, Animal Husbandry, Fisheries) leh PM Surya Ghar Muft Bijli Yojana atanga Scheme paruk tala 90% kalpui tling a nih chuan lawmman dawng tur hian VC hi a tling tihna a ni a. Line department te chuan an Scheme chan theuhah te hma lain, 90% leh a chung lama Scheme kalpui VC te chuan June 27, 2025 hmain DC Office-ah an thehluh ang a, DC chuan VC ti thate zingah pahnih thlangchhuak lehin Ministry of Panchayati Raj hnenah a thehlut leh anga, Sawrkar laipuiin VC ti tha chawimawi tura a thlanchhuah te chu an kawppuite nen Independence Day 2025-ah Special Guest angin an kal thei dawn a ni.