Serchhip-ah Viksit Krishi Sankalp Abhiyan hawn a ni

Nimin khan Serchhip-ah ‘Viksit Krishi Sankalp Abhiyan’ hawnna chu Bawrhsap hova neih niin Awareness Campaign nei turte pawh vailiam nghal a ni.
Viksit Krishi Sankalp Abhiya hawnna hun hi nimin khan Serchhip DC Pisapui Hall-ah neih niin he hunah hian Bawrhsap Paul L. Khuma chuan Viskit Krishi Sankalp kaltlang hian loneitute tan hriatna leh thiamna an sem dawn tih sawiin, “Science thiamna nen, hriatna zau zawk hmangin kan lo neih dan i thlak danglam (transform) ang u,” tiin loneitu kalkhawmte a fuih a. Bawrhsap chuan India ram hi hmasawn mek thu sawiin, he hmasawnna hi change kan thlen tirna tura hun tha a ni tih a sawi a. Khawvel-ah mihring kan pun zel angin kan mamawh pawh a pun zel avangin tunhma lama kan lo tih tawh thin ang ngawt kha hmang lova hma kan sawn a tul thu a sawi a ni.

Nimin-a he hun hman hi Serchhip District KVK North Vanlaiphai-a Senior Scientist & Head Dr. T Vanlalngurzauva chuan kaihruaiin Viskit Krishi Sankalp Abhiyan hi sawrkar laipui hmalakna niin May 29 atanga June 12 chhung hian India rampumah neih a ni dawn tih a sawi a. Agriculture leh a kaihhnawih Department te tanhona hnuaiah loneituten kawng hranga hranga chal lehzuala hma an sawn theihna tura ram pum huap hmalakna a ni tih a sawi bawk.

He hunah hian Agriculture, Horticulture, Fisheries, AH&Vety, Land Resources, Soil & Water Conservation, Rural Development, Irrigation & Water Resources leh Sericulture Department atangin Loneitute hriatna leh thiamna tizau tur te leh an department kaltlanga Scheme hrang hrang awm mek te an chhawr tangkai theihna turin loneitute zirtirna hun hman a nih bakah zawhna leh chhanna hun hman a ni bawk.

Bawrhsap hian Viksit Krishi Campaign a fehchhuak turte chu DC Office tual atangin a vailiam nghal a. June ni 6, 2025 thleng hian Serchhip District khaw tinah tlawhchhuah tum a ni ang.