MZP in Phuldungsei khua Thaidawr tlang panna ah Police duty dah turin Mizoram sawrkar an ngen

Mizo Zirlai Pawl (MZP) General Hqrs. chuan Phuldungsei khua Thaidawr tlang panna ah Police duty dah turin Mizoram sawrkar chu an ngen.

MZP hian nimin khan Aizawl-a MZP Conference Hall-ah Executive Meeting vawi 643-na neiin Mizoram chhung Phuldungsei khua Thaidawr tlang pan chhohna kawng sira Tripura sawrkarin Forest Guest House an sak mek tu tih hriat loh te'n May 28, 2025 zing dar 2:00 leh 3:00 inkara bomb hmanga an beih chungchang a ngaihtuah a. Hetianga mi tu tih hriat loh te'n bomb hmanga Mizoram chhung an bei ta mai hi pawi an tih thu leh an dem thu an sawi a. He thil thlenna hmun hi Mizoram chhung anih avangin Mizoram sawrkar thuneitute'n a rang lama thil thlen dan chhui tur leh Tripura sawrkarin Forest Guest House an rawn sak mek hi remchanga laa titawp nghal turin a ngen a. Thaidawr tlang panna ah hian Mizoram Police duty dah ve nghal turin sawrkar thuneitute an ngen thu an sawi a ni.

MZP chuan Mizoram chhunga Tripura sawrkar-in Forest Guest House an rawn sa ngawt mai leh a bul lawkah Tripura State Rifle te an duty reng laia beih a ni hian Mizoram State puh hmingchhiatna tura thiam taka ruahman a ni ang em tih an ngaihtuah tih an sawi a. Phuldungsei mipuite ti thlabartu leh Mizoram mualphona thlen thei thil thlen dan hi chhui chhuak vat tura Mizoram sawrkar chu ngenin, MZP chuan Thaidawr tlang chhehvela Tripura sawrkarin kut an rawn thlak reng chu a ngaimawh hle tih an sawi a. Kumin April 16 khan helai hmun hi an tlawh tawh thu leh Tripura sawrkar hmalakna chu a rang thei ang bera chawlhsan turin an lo hrilh tawh thu an sawi bawk a ni.

MZP General Hqrs. Executive Meeting hian May 2, 2025-a MZP Federal Council Sitting vawi 58-na neih zawh taka an thurel bawhzui dan tur pawh ngaihtuahin, MZP Federal Council Sitting hian Mizoram in State University tha tak a neih theih nan Mizoram State University Act 2025 chu zirchianna nei a a tul anga hmalak nise tih te; Indo-Myanmar Border hung tumna in Zofate inpumkhatna atan harsatna a thlen dawn avangin dodal zel nise tih leh School thenkhat sawrkar atanga hlawh la te'n Fee sang taka an la thin chu tihtawp anih theih nan hmalak nise tih te chu bawhzui turin Sub-Committee an din a. Zirtirtu aikal la te lakah sawrkarin action a lak theih nan hmalak an rel chu hmalak tawh a ni tih sawiin, a tul anga hmalak zui zel nise an ti bawk.