DAMC in Sawhthing lei meka harsatna an thlirho

Serchhip District Agriculture Marketing Committee (DAMC) chu nimin khan thukhawmin sawrkar in Sawhthing a lei meka harsatna awm te an sawiho.
He thutkhawm Serchhip DC Meeting Hall-a neih hi DAMC Chairman leh Bawrhsap Paul L. Khuma chuan kaihruaiin Sawhthing lei leh hralh chu sawrkar flagship programme a nih avangin sawrkar hnathawkten theihtawp an chhuah a ngai tih a sawi a. “Engtin nge hma kan sawn ang a, engtin nge chak leh zuala ke kan pen ang tih ngaihtuah a, harsatna te pawh langtlang taka inhrilh tawn zel a tul a ni,” a ti.

He hunah hian Secondary Collection Centre (SCC) tin atangin Supervisor leh Co-ordinator ten Sawhthing lei zat, Stock neih mek, hralhchhuah tawh leh PCC atanga lut leh tura an beisei zat te an report a. Sawhthing rate hi phai lamah a tlakhniam tak viau avangin SCC atanga hralhchhuah a harsat thu leh PCC atanga phurluh tur engemawzat la awm nia a lan avanga ngaihtuahna sen thar a tul thu sawilan a ni a. Furpui lo thleng mekah loneituten a phurh kawngah harsatna an tawh thu te, Sawhthing a chawr leh tan tawh avanga hmanhmawh a ngaih thu te an thlen a ni.

He thutkhawm ah hian heng harsatna hrang hrang an tawh mek te hi sawiho niin Reserved price chungchang te, a hralhna rate siamrem chungchang te pawh sawilan a ni a. DAMC in SCC tin te tana inkaihhruaina a siam te tarlan niin loneitu te thatna tur leh rate tha zawka tihral theihna tur invenna hmanrua a nih avangin zawm ngei turin hriattir nawn leh an ni a. Supervisor te chu an bial theuha SCC te uluk taka vila, an hmalak dan te vila enzui pui tur leh, an harsatna te pawh tanpui a, a tul ang zela DAMC-a thlen thin tura tih an ni bawk.

Nimin-a thutkhawm ah hian DAMC Member te bakah Serchhip District chhunga SCC Supervisor, Co-ordinator leh Auction Team te pawh an tel a ni.