Sports Minister in Sumdawng lian ho Mizoram lam rawn hawi turin a sawm

Sports Minister Lalnghinglova Hmar chuan Sumdawng lian ho chu Mizoram lam rawn hawi tura sawmin, Northeast India, a bikin Mizoram chuan Tourism, Sports leh Entertainment-ah te theihna sang tak a nei tih a sawi a, Investor te chu Mizoram-a zin tur leh sumdawnna kawng rawn zawng turin a sawm bawk.

Sumdawng lian intawhkhawmna hun, ‘Rising Northeast Investors Summit’ chu New Delhi-ah neih niin Inrinni khan Sports Minister Lalnghinglova Hmar chuan ‘Northeast: The New Hub of Tourism and Hospitality’ thupuiah thu a sawi a, Minister chuan Northeast India pumpui chu Odisha aia mihring tlem zawk, area-ah pawh UP tiat vel chauh ni mahse khuarel mawina in a tuam vel boruak thianghlim leh Culture hausa, Tourism-a theihna sang tak nei a ni tih a sawi a. “ASEAN ram te nena inhnaih leh inkalpawh awlsam a ni a, Act East Policy hlawhtlinna atan pawh dinhmun pawimawh tak a luah a a ni,” tiin Investor te chu Northeast lam hawi turin a sawm a ni.

Minister chuan Mizoram in adventure tourism ah theihna sang tak a nei tih pawh sawiin, “Mizoram in theihna a neih thu sawi ringawt kan duhtawk tawh lo a, a taka chantir tumin theihtawpin hma kan la mek. Red Bull nen tangkawpin nikumah Asia rama Urban Downhill Mountain Bike Racing hmasa ber chu Aizawl-ah kan buatsaih a, kumin ah pawh kan ti leh dawn.” a ti a. Mizoram-a Krismas lawm dan, a bikin Veng tin leh khaw tin-a ruaitheh chu hmundanga awm ve lo, rampawn thlenga tihlar leh zawrh tlak a nih thu a sawi a. “Northeast hi hmun kilkhawr a ni tawh lo. Mizoram pawh Delhi atangin darkar hnih leh a chanve ah a thlen theih a, Kolkata atang phei chuan minute 45 chauh a ni,” tiin, Aizawl bul thleng rel a luh tawh dawn avangin Investor te tan remchanna a inhawng dawn tih a sawi a ni.

Tourism changtu Minister ni bawk Lalnghinglova Hmar chuan Mizorama Dampa Wildlife Sanctuary chu Asia rama Clouded Leopard Concentration sanna ber a ni tih a tarlang a. Aizawl chu India rama Traffic dan zawm that berna khawpui a nih thu sawiin, Mizoram chu state ralmuang, India rama ziak leh chhiar thiam 100% a puan hmasak ber a nih thu a tarlang bawk a ni. Minister hi Industry hruaitute leh tourism lama mithiamte nen panel-ah a tel zui a ni.

Ministry of Development of North Eastern Region (DoNER) buatsaih ‘Rising Northeast Investors Summit 2025’ hi May ni 23-24, 2024 chhung khan neih a ni a, Prime Minister Narendra Modi chuan hawngin, a hawnna-ah hian Mizoram Chief Minister Lalduhoma chu a tel a. Ni hnih chhung hian India ram hmun hrang hrang atanga Investor fuankhawm hmaah Northeast India a potential awmte tarlana sawiho a ni.