Mi 10,514 ten MUHCS an hmang tangkai tawh

Mizoram Universal Health Care Scheme (MUHCS)-a inziaklut mi 10,514 in he hamthatna hi an hmang tangkai tawh.

Zawhna chhangin Mizoram State Health Care Society (MUHCS) CEO Dr. Biakthansangi chuan niminpiah atanga online-a MUHCS inziahluh theihna an hawn atangin darkar 24 chhungin mi 17 an inziaklut tawh tih a sawi a, phai lama refer pawh an thahnem tawh hle tih sawiin, nimin thlenga refer tawh zat chu mi 637 an nih thu a sawi a ni. Dr. Biakthan-sangi chuan April ni 1 atanga damlo inenkawl tawh zawng zawng te bill an pekchhuah tawh zat chu Rs. 6,65,17,935/- a nih thu a sawi a. Sawrkar Hospital-ah mi 9465 in MUHCS hi hmang tawhin heng zinga 8071 chu damdawi In chhuahsan tawh an ni a, mi 1394 chu enkawl mek an nih thu a sawi a. MUHCS hnuaiah niminpiah thlenga Private Hospital inziaklut tawh pakuaah damlo 1049 in MUHCS an hmang tawh a, an zinga 901 chu damdawi In chhuahsan tawh an ni a, 148 chu damdawi In-a awm mek an ni. 

Dr Biakthansangi chuan Health Care Scheme hlui zawk bill an hnenah a la luh reng thu sawiin, nimin thlenga bill ba an la neih zat chu cheng vbc. 2.96 a nih thu a sawi a. Hei hi damlo te damdawi In atanga an chhuah hnu leh a then phai-ah te kala an haw hnuah an thehluh te a ni a, an tihfel thuai dawn thu a sawi a ni.  Mizoram Universal Health Care Scheme-ah hian awlsam takin mahni In lum atanga inziahluh theih reng a nih tawh thu Dr. Biakthansangi chuan a sawi a, mipuite chu inziaklut zel turin a sawm a ni.