Larsap-in lehkhabu pathum a tlangzarh

Mizoram Larsap, General (Dr) Vijay Kumar Singh chuan nimin khan Prof. Laltluangliana Khiangte lehkhabu ziak pathum te chu a tlangzarh.

School of Humanities and Languages, Mizoram University (MZU)-a Dean Prof. Laltluangliana Khiangte lehkhabu ziak pathum- 'Anti-Colonial Chieftainess: Lalnu Ropuiliani'; 'Indigenous Tribal Warrior: Pasaltha Khuangchera' leh 'Anti-Colonial Hero: Mizo Lal Zakapa' tih lehkhabu te tlangzarhna hun Seminar Hall, Academic & Seminar Complex, MZU-a neih ah hian Larsap chuan Mizo history leh culture tarlanna lehkhabu 3 te mipui chhiar theiha tlangzarh a ni chu lawmawm a tih thu sawiin, lehkhabu ziaktu Prof. Laltluangliana Khiangte hmalakna fakawm a tih thu a sawi a. Prof. Laltluangliana Khiangte chu literature, zirna leh Mizo hnam ziarang vawnhim lama sulhnu ngah leh thiamthil ngah tak a nih thu sawiin, Padma Shri (2006), Sangeet Natak Akademi Puraskar (2018) leh Rastriya Lok Bhasha Samman (2003) chawimawina a dawnte chuan Indian Arts leh Culture vawnhim kawnga a thawh hlawk zia a tarlang a ni, a ti bawk.

Larsap chuan Mizo hnam chanchina mi pawimawh tak tak - Lalnu Ropuiliani, Pasaltha Khuangchera leh Lal Zakapa te chanchin ziahna lehkhabu pathum te chuan zirtir leh kawhhmuh hrang hrang nei mah se, pawnlam awpbeh tumna laka zalen tura huaisen taka beihletna an tarlang a ni, a ti a. India ram hmun hrang hranga chengte chanchin ziahna tam zawk chu min awpbettute ziah a nih thu sawiin, midangte hriata kan hnam ziarang dik tak kan pholana, thangtharte hnena kan chawr chhuah dan dik kan hrilh chhawn theih nan keimahni hnam ziarang mila dik taka history kan ziah that lehte pawh a tul thu sawiin, hemi tur hian zirchianna nasa zawka kalpui pawh a tul a ni, a ti bawk.

Heng lehkhabu tlangzarhna hunah hian MZU Vice Chancellor, Prof. Dibakar Chandra Deka chuan inlawmna thu sawiin, mthiam hrang hrang ten heng lehkhabu thlirlawkna hun an hmang bawk a ni.