Ruihhlo do chungchangah inrawnkhawm a ni

Ruihhlo leh a kaihhnawih chungchanga hmalak zel dan tur inrawn-khawmna chu nimin khan Social Welfare, Women & Child Development Minister Lalrinpuii hovin Aijal Club-ah neih a ni.

He inrawnkhawmna ah hian Nasha Mukh Bharat Abhiyaan (NMBA) hnuaia hmalakna te, Ruihhlo do kawnga hmalak dante leh Interntional Day Against Drug Abuse and Illicit Trafficking hman dan turte bakah pawimawh dangte an sawiho a, he hunah hian Social Welfare Minister Lalrinpuii chuan ruihhlo do kawngah theihtawp chhuaha hmalak a tul takzet thu leh hmalakna thar neih a tul thu sawiin, Demand Reduction, Supply Reduction leh Harm Reduction-ah te beihpui thlak a tul thu a sawi a. Ruihhlo do kawnga hmalatu hrang hrangte inkarah hnathawh inhriatpuitawn leh intanpui tawn te a tul thu sawiin, mahni hmazawn theuah ah tangkai zawka kan thawh a pawimawh a ni, a ti.

Minister chuan ruihhlo ngaite’n dam hlenna an chan theih nana pawimawh tak pakhat chu ‘Aftercare treatment’ a nih thu sawiin, hemi atan hian Jordan Centre, Sethawn chu After-Care Centre leh De-Addiction & Rehabilitation Centre atana hman tura duan a nih thu leh ruahmanna thehluh a nih thu a sawi a. Hei hi ruihhlo nghei rei tawhte leh rehabilitation programme paltlang tawhte enkawlna tur a nh thu sawiin, Presbyterian leh Baptist Kohhran lam pawh dawr niin an inhuamna an ngaichang mek tih a sawi a. Centre Accreditation Rules siamrem ngai pawh buaipui mek a nih thu sawiin, reilote ah peihfel tum a nih thu a sawi a. State Drug Policy kan neih theih nan hmalak chhoh tan a nih thu pawh sawiin, Law Enforcement Agency-te leh tlawmngai pawl ten theihtawp an chuah chung pawha ruihhlo hman a hluar zel chu veiawm a tih thu a sawi a, Centre hrang hranga Medical service kalpui dante, Detoxification leh craving (ruihhlo chakna) tih ziaawm dan tura hte ruahmanna leh hmalakna thar kan neih a tul thu a sawi bawk.

He hunah hian District tin DC leh an aiawhten an District theuha NMBA hnuaia ruihhlo do kawnga an hmalakna leh harsatna an tawhte an tarlang a. District tinah Social Media, Concert leh Sports hmangin Awareness Campaign nasa taka kalpui a ni a, thalai leh zirlaite zingah ruihhlo ti lo tura thutiam (pledge) lakna te, School leh College hrang hrang ah Anti-drugs Club din a nih thu te leh zirtirtute pawh training pek an nih thu te an sawi a ni.

SWWC Department lamin a hriat theih chinah tun dinhmunah hian Ruihhlo ngai enkawlna Home Mizoram-ah 44 a awm mek a, heng zingah hian Kohhran Centre 8 awmin, Sawrkarin Social Welfare Department kaltlanga a din Centre 2 awm a, a bak zawng chu mimal leh tlawmngai pawl din a ni.