Vawiin atanga ruah sur tura hmuhlawk ah Serchhip District mipuite fimkhur turin chah an ni

India Meteorological Department (IMD) chuan May 29, 2025 atanga June 3, 2025 thleng hian Mizoram-ah leh Hmarchhak State dangah te Thlipui leh Ruahpui rawn thawk thei tur angin thuchhuah a siam a, mipuite chu fimkhur tura chah an ni.
Hemi chungchanga Serchhip District Bawrhsap leh District Disaster Management Authority-a Chairman Paul L. Khuma’n nimin-a thuchhuah siama a tarlan danin May ni 29, 2025 atanga June ni 3, 2025 chhung hian Mizoram hmun hrang hrangah ruah tam tham tak sur tur angin hmuhlawk a nih thu a tarlang a. Hei vang hian mahni In leh lo te thli leh ruah a dawl theih nan a tul anga thawmthat ngai laite thawmthat tur a nih thu te; Tui paihna leh tui luankawr te tha taka siam tur a nih thu te; Ruahsur avanga leimin thei laite hriatchiana fimkhur tur a nih thu te; Tui hmun, lui leh ramhnuai ah te kal loh a that thu te; Ruah vanga Eng (power supply) neih loh theih a nih avangin Electric hmang thil te a charge lawk theih apiang charge lawk a that thu te; Rikrum thila mamawh tur torch light, emergency light, first aid kit, tui thianghlim leh eitur te lo inrin lawk a that thu leh Tek tla lakah kan him zawk nan Khawpui ri a lo awm a, Tek tlak laiin Thing kung leh Electric ban hnaihah te awm loh tur a nih thu te a tarlang a ni.

Hei bakah hian Bawrhsap chuan chhiatna a lo thlenin Serchhip District Emergency Operation Centre Phone number-ah engtik lai pawhin biak theih reng a ni tih tarlangin, bepawp duh tan Ph. No. 9862116104 leh 1077-Toll Free Number biak theih a ni tih a tarlang a. Hei bakah hian Serchhip District chu Zone hrang hrang 10-ah thenin heng-ah hian Zonal Officer pawh ruat nghal vek an ni bawk a, chhiatna thleng a awm a nih chuan heng Zonal Officer te hnenah hian a rang thei ang bera hriattir tur a nih thu a tarlang a ni.

Khawchin hrilhlawkna ah hian Vawiin, May 29, 2025 hian thli leh ruah hi thawk na zual thei tura hrilhlawk a ni bawk.