Health Minister in MUHCS chu thil tha a nih thu sawiin, chhawr tangkai theuh turin a sawm

Health Minister Lalrinpuii’n Mizoram Universal Health Care Scheme (MUHCS) chu thil tha tak a nih thu sawiin, natna a awm chiahin a pawimawh zia leh a thatzia a langchhuak thin tih a sawi.

Mizoram Journalists Association (MJA) General Headquarters member te tana a thlawna inentirna buatsaih hawnna hun nimin-a Aizawl Civil Hospital Doctor’s Seminar Hall-a a hawnnaah he thu hi sawiin Health Minister Lalrinpuii chuan Mizoram Sawrkar-in mipuite tan a thlawna inenkawl theihna tur a duan, Mizoram Universal Health Care Scheme (MUHCS) chu mi tinin chhawr tangkai se a duh thu sawiin, Mipui vantlang Golden Card neilo te tan Rs. 2500 in a inziahluh theih a, cheng nuai 5 thleng an bill thei tih sawiin, Rs. 5000-a inziaklut ten cheng nuai 5 thleng bill theiin Semi-Private Ward-ah te an awm theih thu a sawi a. Rs. 10,000-a inziaklut te chuan cheng nuai 5 bill thei mahse Private Hospital-ah pawh Private Ward-ah bill theih a nih thu a sawi a. Pensioner ten cheng nuai 12 thleng an bill theih thu sawiin, sawrkar hnathawkte chuan Central Healthcare Scheme ang thovin tawpchin awm loin an bill theih thu a sawi a ni.

Health Minister chuan MUHCS hnuaiah hian damlo mamawhtuten awlsam zawka phai lam an pan theih nan ‘Simplifying Referral System’ an duan thu pawh sawiin, hei hi Private Hospital ten MUHCS an la zawm ve theih rih loh deuh avanga awlsam taka refer case an neih theihna tura an siam a nih thu a sawi a, hetah hian MUHCS hnuaiah Specialist Doctor in damlo a enin refer ngai a nih chuan State pawnah a refer nghal theih dawn thu a sawi a. He Dan hmang hian Sawrkar hnathawk 260 vel State pawna Refer an ni tawh a, hei bakah hian mipui nawlpui leh Pensioner pawh thahnem tak phai lama refer an ni tawh tih a sawi a ni.

Hei bakah hian mipuiten inenkawlna changtlung zawk an dawn theih nan Sawrkar enkawl damdawi In te thuamthat mek a nig thu pawh Minister chuan sawiin, tunah hian Civil Hospital, Aizawl-ah Cardiology Operation Theatre an sa mek a, peih a nih hunah tunhmaa an tih theih loh thil tam tak an ti thei dawn a, Kal thlak (Kidney Transplant) pawh an ti thei tep a. Lung zai theihna tur pawh ZMC&H-ah buatsaih mek niin hei hi peihfel a nih chuan Private Hospital-a cheng nuai 8 chuang sen ngai thin chu cheng nuai 1.5 vel lekin a zai theih dawn a, MUHCS-a inziaklutte tan chuan a thlawn vek-a tih theih a ni dawn a, hei bakah hian Thluak zaina thenga buatsaih tum a ni tih a sawi bawk a. Civil Hospital leh ZMC&H-ah Doctor thiam tak tak an awm a, heng an Doctor neihte hi an iaiawm lo tih sawiin, mipuite chu Civil Hospital leh ZMC&H-ah ngei inentir thin turin a sawm a ni.

MJA Free Clinic hi tun thla ni 30 thleng buatsaih a ni dawn a, hemi hun chhung hian MJA Member te chu a tahtawlin a thlawnin an hriselna dinhmun enfiah sak an ni dawn a ni.