Ruihhlo ngawlveite enkawlna pakhat atana Short Stay Centre (OSC) din chungchang sawiho a ni

Ruihhlo ngawlveite enkawlna pakhat atana Short Stay Centre (OSC) din chungchanga inrawnkhawmna chu niminpiah khan Social Welfare Lalrinpuii ho hian Aijal Club Conference Hall-ah neih a ni.

He inrawnkhawmna hunah hian Mizoram a ruihhlo ngaite enkawlna hrang hrang leh an tun dinhmun te tarchhuah niin, Rehabilitation Centre/Home piah lamah chutiang hmun piah lama ngawlveite lo enkawl hmasakna tur atan mi tam zawk lenna leh hmun khat mai nilo Short Stay Centre din mamawhna leh harsatna awm theite sawiho a ni a. Meeting chuan din ngei tha tiin, a kalpui dan tur leh enkawl zui dan tur te, hmalak dan tur ngaihtuah tura Core Committee leh Task Group te din nise tiin Social Welfare chu hma latu tura ruat a ni.

Department in zirchianna a lo neih tawh danin awmze nei taka ruihhlo ngawlveite enkawl tur chuan hun rei tak a duh a,a lo ber ah thuang thum De-addiction, Rehabilitation leh After Care kalpui ngaiin thla engemaw zat hun a duh a, tuna kan dinhmuna kan mamawh hmasa ber ah chuan Short Stay Center siam niin Detoxification tih phawt a, an hriselna te endik leh eitur tha pek niin Counselling te pek an ni anga, chumi atan chuan SSC hi hman a ni ang a, mithiam enkawlna hnuaia kalpui a ni ang. Ruihhlo ngaite chu ni 15 vel hetianga SSC-ah enkawl an nih hnuah Rehab Centre emaw, Camping hmun te emaw, IRCA etc ah te enkawl zui leh a tul thu leh, chung hmun an chhuahsan hnuah pawh an taksa leh rilru dinhmun azira Medical leh Psychological Care follow up tih bakah after care tih chhunzawm a tul thu a sawi a ni.

Hetihlai hian Social Welfare Minister Lalrinpuii chuan nimin khan Social Welfare Department leh Directorate of AYUSH tangkawpin a thlawna kum upa leh ruihhlo ngai te tana rilru lam harsatna inentirna hun Dawrpui Multipurpose Centre, Aizawl-a an buatsaih chu hmanpuiin ruihhlo ngai te chu ram hmelma leh misual an ni lo tih sawiin, anmahni ringawta talchhuah an harsat avangin puitu an mamawh tih a sawi a. Minister chuan ruihhlo ngai tam tak, thlanmual leh hmun hrang hrangah an punkhawm thu leh a khawngaih takzet thu sawiin, Ruihhlo avanga harsatna tawkte enkawl dan tur pawh tunhnaiah sawrkarin ngawrh takin a ngaihtuah tih sawiin, Ruihhlo ngai te lo tuamhlawmna tur hulhliap ruahman tum a nih thu leh hetah hian lo bual fai a, chaw ei tur te lo pek an nih dawn thu a sawi a. Ruihhlo avanga harsatna chu sawrkar, Kohhran, Home leh pawl ang chauha chinfel theih a nih loh thu a sawi a, kawng hrang hranga tangruala beih a ngai a ni, a ti.

Social Welfare Minister chuan kum upate leh ruihhlo ngaite puala rilru lama harsatna nei te tana a thlawna inentirna buatsaih a ni chu lawmawm a tih thu sawiin, an sawrkar tirhah kum upate hamthatna dawn thin tihpun chu an intiam anga an tih hlawhtlin tawh thu a sawi a. Kum upa te tana Zoram nuam chu ban phak maia awm a nih thu sawiin, sawrkar chuan theihtawp a chhuah zel dawn thu a sawi a ni.