NITI Aayog te tanpuina hmu zel chungin ram changkang ah kan siam ngei ang - Chief Minister

Chief Minister Lalduhoma chuan, “NITI Aayog te tanpuina hmu zel chungin kan ram hi ram changkang ah kan siam ngei ang,” a ti.

Inrinni khan New Delhi-ah Prime Minister Narendra Modi kaihhruaina hnuaiah NITI Aayog Governing Council thutkhawm vawi 10-na chu neih a ni a, he hunah hian Mizoram atangin Chief Minister Lalduhoma pawh telin thu a sawi a, he hunah hian Chief Minister chuan tunhnaia Operation Sindoor hlawhtling taka neih a nih avangin Prime Minister Narendra Modi lawmpuina hlanin, “Mizoram mipuite chuan kan thlawp tlat a ni,” a ti a. Tunhnai lawkah Mizoram chu ‘Fully literate State’ a puan a nih thu sawiin, “Hei hian Mizoram chu chhawr tlak mihring (human capital) lama a inbuatsaih nasatzia leh a hlawkpui zia a tilang. Unemployment rate hi 2.2 % a ni a, workforce ah hmeichhiate inrawlhna chu 45% lai a ni. Skill lamah pawh kan duai lo hle a. Khawvel huap inelnaah India aiawh thei khawpa tha kan nei,” a ti.

NITI Aayog State Support Missions kaltlangin hmalakna chak taka an kalpui thu Chief Minister chuan sawiin, “Viksit Bharat 2047 kan thlen theih nan Department tin te chu an ruahmanna (action plan) kan thehluhtir a, an mamawh an kan hriatsak bawk a. Heng behchhan hian Vision Document kan buatsaih mek a ni. Reilote ah NITI Aayog-ah rawn thehluh a ni ang,” a ti a. Viksit Bharat 2047 atana an hmalakna langsar tak chu Bana Kaih Scheme a nih thu sawiin, “Ram hmasawnna atana thawhpuitlak (progress) partner te chu collateral free loan nuai 50 thleng kan pe thei a, an thawh that dan a zira interest zaa za free kan pe ang. Tunah hian chutiang thawhpui chu a thawh khat nan mi 517 kan thlang fel tawh. Central scheme te nena kaldun zel tura duan a ni,” a ti.

Chief Minister chuan farmer te tan Market Support System tha tak an kalpui thu leh Entrepreneur te tan hmalakna tur remchang leh hamthatna an siam thu sawiin, “Kan innovator te tan grassroot competition kan buatsaih bawk. Competition hmasa ber atangin mi 40 chu grassroot innovators ah kan puang a ni,” a ti a. Empowering Mizoram Sport kalpui mek thu anih thu te; Investment Policy tunlai leh tha zawk an siam thu te sawiin, “Mizoram mipui zatve aia tam hi khawpui ah kan cheng a. Khawpuia cheng zaa sawmriat hi Aizawl-ah an cheng mek. Chuvang chuan Aizawl hi a tawt em em mai a ni. Kan thalaite hi Primary Sector atanga Industry leh Service Sector lama tam zawka an luhna tur kan dap ngei ngei a ngai a. He mi kawnga kan mutan kheng thla turin khawpui thar, mipui nuai sawm atanga nuai 15 vel khawsakna tur Thenzawl-Peace City din kan duh a ni,” tiin “Ministry of Housing & Urban Affairs chuan min thawhpui (support) tha a, an chungah kan lawm hle,” tiin “Prime Minister Pu Narendra Modi kaihhruaina hnuaiah NITI Aayog te tanpuina hmu zel chungin kan ram hi ram changkangah kan siam ngei ang,” a ti bawk.