COVID-19 lakah Mizoram a la him niin ngai

Tunhnaiah India ram hmun thenkhat ah COVID-19 hri kai hmuhchhuah awm leh mah se he hri lakah hian Mizoram chu ala him nia ngaih a ni.

Health Department hnuaia Integrated Disease Surveillance Programme (IDSP) hotute chu tunhnaiah khan thukhawmin COVID-19 hri leng thar leh mek chungchang hi an thlirho a, kuminah Mizoram-ah COVID-19 hri kai hriatchhuah an la awm lo tih sawiin, COVID-19 lakah Mizoram a him rih ah ngaih a nih thu an sawi a, amaherawhchu he hri laka inralring turin a theih ang anga inbuatsaih a ngaih thu an sawi bawk a ni. Chhinchhiahna atanga a lan danin Mizoram-a COVID-19 hri kai hriatchhuah hnuhnun ber chu nikum October thlaa mi a ni a, hemi hnu hian hri kai hmuhchhuah la awm lovin hrileng a zia tak zelah khan COVID-19 hri kai leh kai loh endikna hi ZMC-ah chauh dah a ni tawh a, endik ngai chu an awm ve deuh reng a, mahse kumin ah hri kai hriatchhuah an la awm lo tih chu an sawi bawk.

IDSP hotute chuan hri leng chungchang ah hian National Centre for Disease Control (NCDC) ngaihchan a nih thu leh NCDC lam pawhin an thu lo ngaichang tura an tih thu te an sawi a, chumi chhunga hmanraw lamah a theih ang anga inen a nih thu leh PPE pawh a tul thuta hman tur a awmah ngaih a nih thu te an sawi a ni.

Sawrkar laipui-a Ministry of Health and Family Welfare-in an chhinchhiah danin tunhnaia he hri rawn leng lehah hian India ramah mi 250 chuangin an vei tawh a, Kerala., Maharashtra leh Tamil Nadu-ah te hri hi a leng nasa zual a ni.