MIC in RTI Online chungchang an sawifiah

Mizoram Information Commission (MIC) chuan tunhnaiah mi thenkhatin RTI Online hman theih loh a nih avangin harsatna an tawk tih hriat a nih thu thuchhuah siama tarlangin, hemi chungchang hi a enkawltu Department (Department of Information & Communication Technology) hotute nena sawiho niin hmalak a ni tih thuchhuah siamin an tarlang a. Tunah chuan siamthat tawh niin a hman theih tawh a, amaherawhchu, lut thei lo an awm leh tih hriat a nih thu pawh tarlangin, internet lam fel loh vang te pawh a ni thei tih an sawi a. Pawisa in-cut vek si a zawhna lut lo an awm a nih chuan Phone no. 6033206128-ah in report turin an ngen a, pawisa in-cut in hmuhlet lehna turin hmalak mek a ni tih an sawi.

MIC thuchhuah chuan RTI chu online-a dil thei lo tan manual-in a dil theih reng tih pawh tarlangim, prescribed form a awm lova, plain paper ah ziakin application fee Rs. 10/- (Cheng sawm) nen a concerned SPIO hnena thehluh mai tur a ni tih an tarlang a. SPIO hnen atang hian Rs. 10/- receipt lak ngei tur a nih thu leh hei hi First Appeal leh Second Appeal thehluh hunah a tul thin avangin dahthat tur a ni tih an tarlang bawk.