Rajiv Gandhi Stadium ram Home Department-in Sports Department kutah an hlan

Aizawl Mualpui-a Rajiv Gandhi Stadium leh a chhehvel ram chu nimin khan Mizoram sawrkar Home Department kut atangin Sports and Youth Services Department kutah hlan a ni.

Helai ram inhlanna hun hi nimin khan Home Minister K. Sapdanga Office-ah neiin Home Secretary Vanlalmawia leh Sports and Youth Services Department Secretary V. Lalsangliana-ten hming an ziah hnuah Home Minister-in SYS Minister Lalnghinglova Hmar hnenah a hlan a ni. Mualpui-a Rajiv Gandhi Stadium dinna leh a chhehvel ram hi Landlease No. 23 of 1992 chhunga mi a ni a, Home Department ram niin 3rd Battalion MAP hmun a ni a. Kum 2010 khan he hmuna khelmual siam hna hi tan niin Mizorama khelmual tha leh changtlung ber a ni a; a hmunhma enkawl hi SYS Department kutah awm mah se a ram hi Home Department ta a la ni chhunzawm zel a, nimin khan SYS kutah neitu nihna hi hlan a ni ta a ni. Rajiv Gandhi Stadium awmna leh a chhehvel ram hmun thenkhat, Home Secretary hminga awm mek chu Sports & Youth Services Department hmingin dah a ni tawh ang.

Nimin-a ram inhlanna hunah hian Home Minister K. Sapdanga chuan Mizoram Police hmun pawimawh leh ui em em chu thalaite tan leh Sports hmasawn zelna atan SYS Department kuta an hlan thu sawiin, “Neitu nihna thinlung nen tangkai lehzuala in hman ngei ka beisei,” a ti a, a thawhpuiten vawi engemaw zat an sawiho hnuah an ram hlu tak chu ram tana tangkai tur zawka an rin avangin Sports Department kutah an hlan ta tih a sawi bawk.

Sports Minister Lalnghinglova Hmar pawhin Sawrkarin Sports kalpui duh dan mumal tak a nei tih sawiin, “Sports-ah sum leh hun kan seng hnem chungin rampum huap intihsiaknaah kan la hniam em em. Chuvangin Rajiv Gandhi Stadium leh a chhehvel hmunhmate hi Sports hmunpuiah siam a, training-na hmunhma leh Centre of Excellence-a siam tumin ruahmanna kan nei a, Home Department-in phal taka kan kuta an hlan hi kan lawm takzet a ni,” a ti bawk.