HC in thupek thar tichhuak

Gauhati High Court, Aizawl Bench chuan naupangte chunga mipat hmeichhiatna lam hawia hleilenna thleng thin chungchanga thutlukna a siam zulzuiin thupek a chhuah.

Tunkar Thawhlehni khan Gauhati High Court, Aizawl Bench, Justice Kaushik Goswami thutna chuan mipat hmeichhiatna rawng-kaia naupangte chunga hleilenna chungthu a ngaihtuah a, Dan hnuaia naupangte sawt zawka humhalhna an dawn theih nan thupek a chhuah hi a chhuah a. He Thupekin a tarlan dan chuan Sawrkar leh Private School-te'n an zirlai naupangte venhimna leh humhalhna kalhmang tha tak an duang tur a ni a. Naupang laka hleilenna thlen thulhah hmalak dan tur Inkaihhruaina an siam tur a ni. 

Hei bakah hian Zirna In zawng zawngah nu leh pa te leh zirlaite tan mipat hmeichhiatna kawnga naupangte chunga hleilenna thleng thei laka inven theihna kawng inzirtirna neih thin tur a ni a. Zirlai naupangte chu an kum milin anmahni humhalhna leh venhimna lam hawi inzirtirna zirlaibu-ah telh tur a nih bakah naupangte humhalhna kawnga hmalatu pawl leh sawrkar Department hrang hrang chung-chang uar zawka naupangte hnena hrilhhriat leh Media kaltlanga hemi lam hawi inzirtirna uar zawka kalpui turin thupek chuan a tarlang a ni.