Serchhip District-ah Polling Station 2 siam belh rel

Serchhip District Level Standing Committee on Rationalization of Polling Stations chuan Serchhip District-ah Polling Station thar pahnih siam belh leh Polling Booth Building pahnih sawn an rel.

Nimin khan Serchhip District Level Standing Committee on Rationalization of Polling Stations hi an Chairman leh Bawrhsap mawh-phurhna la mektu Lalmuansanga Ralte hovin Serchhip DC Meeting Hall-ah an thukhawm a, he hunah hian Rationalization Meeting chu Election Commission of India hun bituk mila kalpui ngai, online a neih rem chiah si lo a ni tih thutkhawm kaihruaitu Lalmuansanga Ralte chuan a sawi.

He thutkhawm a tel te hian hian 27/13 Chhingchhip-I Polling Station chu voters awm zatin Election Commission duh dana voters awm tur zat a pelh hnaih avangin Polling Station thar pahnih-a then an rel a, 27/13 Chhingchhip-I Polling Booth atan Govt. P/S-I leh 27/14 Chhing-chhip-II Polling Booth atan Govt. H/S Chhing-chhip-ah thendarh an rel a. Hetiang bawk hian 28/22 N. Vanlaiphai-I pawh voters awm tur zat atana ECI duh chin a pelh hnaih avangin Polling Stations pahniha then an rel a, 28/22 N. Vanlaiphai-I Polling Booth atan Higher Secondary School leh 28/23 N. Vanlaiphai-II Polling Booth atan Govt. Oriental M/S te hman turin an rel bawk.

26/10 Thenzawl X Polling Booth atana Govt. Standard M/S hman thin chu Govt. Lal-lengvunga High School-ah sawn relin, 26/14 Serchhip-IV Polling Booth ni mek Lalpuithanga Hall pawh Serchhip Kawnpui VC Hall-ah sawn an rel bawk a. Heng an thurel te hi Election Commission of India pawmpui tura thawn leh a ni dawn a ni.

He thutkhawm ah hian Serchhip Election Officer Lalrinchhani Ralte bakah ERO, AERO leh sawrkar mi pawimawh te leh Political Party aiawhte an tel a ni.