Lenkawl

Serchhip Sub-Hqrs. YMA chuan Serchhip bialtu MLA, Lalduhoma hnen atanga Oxygen Concentrator an dawng chu lawmawm an tih thu nimin-a SEC thutkhawm an neih ah sawiin, damlohna vanga he khawl hmang mamawh te tan a thlawnin tum khat-ah ni 14 (chawlhkar hnih) chhung hman theih nise an ti a, a hmangtute tana kaihhruaina pawh siam nghal a ni bawk.

Serchhip District-ah COVID-19 hri kai hmuhchhuah chu mi sang nga an tling dawn hnai ta a, hri kai enkawl dam pawh an pung ve zel.

Serchhip Sub-Hqrs. YMA chuan Central YMA hruaitu thlanna lo awm tura an huamchhunga YMA Branch leh Group te chu Vote zawnga tawktar siama rawn bia an awm a nih chuan lo dawngsawng lo turin an chah.

Serchhip District Cricket Association in an buatsaih kum 18 hnuailam tana Cricket khelh dan zirna chu nimin khan Serchhip P&E Veng a Leisekawt Mual-ah neih tan a ni a, Mizoram Cricket Association (CAM) in an rawn tirh Lal-ruatsanga (Atea) chuan zirtirna a pe a ni. He hunah hian kum 18 hnuailam mi 18 an tel a, tun thla ni 30 thleng khian nitin hun hman tura ruahman niin tun tumah hian Cricket zir duhte tan hian sum chawi ngai lovin zir theih a ni.

Serchhip District Urban Development Office chuan faina lama ke pen theuh turin mipuite an sawm.

DAN ANGA FA LAK (LEGAL ADOPTION)

Dr. ZR. Thiamsanga’n hawng

Niminpiah khan Mizoram-ah COVID-19 hri kai 497 hmuh leh niin heng te hi Sample enfiah 3692 atangin a ni a, Sample enfiah atanga za zela 13.46 te chuan hri an kai a ni.

Cheng nuai 782.76 senga Siaha tui lakna thawmthatna tur an siam, Augmentation of Urban WSS, Siaha chu nimin khan Social Welfare Minister Dr. K. Beichhua chuan a hawng.

Mizoram Finance and Accounts Service Association (MFASA) chuan niminpiah khan Aijal Club-ah Annual General Conference vawi 26-na hmangin Deputy Chief Minister Tawnluia chuan a hmanpui a ni.

Commerce & Industries Department changtu Minister Dr. R. Lalthangliana chuan Mizoram chu hripui in a nuai nat ber zinga mi a nih avangin Industry tenau (Micro Enterprises) te’n an tuar nasa em em tih sawiin, Mizoram a Industrial Unit-te khaichhuahna tura a bik taka tanpuina pe turin a ngen.

Nimin khan Serchhip District-ah COVID-19 hri kai mi 60 zet hmuhchhuah belh leh an ni.

Serchhip District-a African Swine Fever (ASF) hri lenna khaw hrang hranga Vawk talh chungchang khapna siam chu tih danglam niin khaw pali tihloh ah chuan Vawk talh phal a ni ta.

Serchhip District-a COVID-19 hri leng mek dona kawnga a tul anga thawk turin nimin khan Ngurthansangi d/o C. Lalrammawia, Serchhip Hmar Veng chu nimin khan Serchhip CMO Office-ah a inpe a, amah hi APT Aizawl atanga Laboratory Technician zir zo hlim niin Serchhip a Sample Collection Team-ah dah nghal a ni a, nimin atang khan Sample lakkhawm hna thawkin a hna a thawk nghal a ni. Heti hian Serchhip District-ah COVID-19 hri leng dona kawnga hlawh beisei lova thawk tura inpe mi 30 an la awm mek nia thudawn a ni.

Serchhip Kawlri tlang-a Eklavya Model Residential School-a zirlaite chu nimin khan an Sample enfiah sak niin COVID-19 hri kai mi 17 zet hmuh an ni.

Serchhip District chhung khaw hrang hrang ah African Swine Fever (ASF) vanga Vawk thi a ziaawm chhoh mek laiin nimin khan Baktawng khua ah ASF vangin Vawk thi 11 zet a awm leh a, heng zinga 8 te hi vawk note a ni thung. Bak-tawng khua ah hian ASF vangin Vawk 115 zet a ni tawh a, Serchhip District chhung khaw 35-ah ASF vanga Vawk thi chu 3887 a tling tawh bawk a ni. Serchhip District chhungah hian ASF vanga Vawk suat erawh a awm belh tawh rihloh thung a, hri lenna hmunaah Vawk 3040 suat ni tawhin hri lenna hmuna puan ni lo khaw dang ah Vawk thi 64 chhinchhiah a awm bawk a ni.

Sawrkar laipui ruahmanna anga Mizoram District hrang hranga damdawi In fai thlanna, Kayakalp kalpui leh mekah nimin khan Ser-chhip District Hospital chu kumin atan rawn enfiah leh a ni a, he endik hna hi Lunglei damdawi In-a thawktu ten rawn neiin Serchhip damdawi In-a Ward hrang hrang leh building bakah room hrang hrang an enkawl dan te enfiah niin thawktute pawh zawhna te an zawt nghal bawk a ni. Damdawi In fai thlanna ah hian District hrang hranga thawktute inkalthelh in enfiah a ni a, Serchhip District chuan Siaha District Hospital an enfiah ve thung ang.

Mizoram State Boxing Championship 2021 chu tun thla ni 29 atang khian Serchhip-ah khelh a ni dawn a, hemi chungchang ngaihtuah hian nimin khan Serchhip-ah Organising Committee chu an thukhawm.

Niminpiah khan Mizoram-ah Sample 4298 enfiah leh niin heng atang hian hri kai 570 hmuh leh an ni a, Sample enfiah atanga za zela 13.26 te chuan hri an kai a ni.

Nimin khan Hnahthial-ah Association for Voluntary Blood Donation (AVBD) Branch thar hawn a ni.