Vawk talh phalna tihchhuah a ni leh ta

Serchhip District-a African Swine Fever (ASF) hri lenna khaw hrang hranga Vawk talh chungchang khapna siam chu tih danglam niin khaw pali tihloh ah chuan Vawk talh phal a ni ta.

Hemi chungchanga nimin a Serchhip District Magistrate Kumar Abhishek-a’n thuchhuah siama a tarlan danin Serchhip District khua tam zawk tuamtu ASF hri leng hian tunah chuan hmun tam takah ziaawm lam a pan nia hriat ani tih tarlangin, Infected Area-ah pawh Vawk engemaw zat in hri an kai lo nia hriat a nih avangin ruahmanna siam a tul thu a tarlang a. Hemi ang hian Sec. 144 Cr.Pc 1973 in thuneihna a pek angin Chhuanthar Tlangnuam, Baktawng, Thentlang leh Sialsir tihloh khaw dang ah te chuan Vawk hrisel nia hriat te chu Village Council hriatpuina leh phalna in talh theih a ni tawh dawn a, VC ten a neitu hming, Address leh Phone Number leh Vawk talh zat record tha takin an vawng tur a ni ang. Vawk talhtu leh puahtu ten fimkhur takin an talhna hmunhma tha takin an ti thianghlim tur ni bawkin, Serchhip District-a hri awmlohna khua ah te chuan Vawk lakluh leh thawnchhuah phal a ni a, tualchhung Vawk ngei a ni tih hriatpuina neih a ngai thung a ni. He thupek hi chhuah a nih atanga thla hnih (2) chhung huam tur niin thupek zawmlo te chu Section 188 IPC hmanga hrem theih an ni ang.