Deputy CM in MFASA Conference a hmanpui

Mizoram Finance and Accounts Service Association (MFASA) chuan niminpiah khan Aijal Club-ah Annual General Conference vawi 26-na hmangin Deputy Chief Minister Tawnluia chuan a hmanpui a ni.

MFASA Annual General Conference-ah hian Deputy Chief Minister chuan MF&AS Officer te hnathawh tlangpui chu Budget siam leh enkawl te, Sawrkar Accounts vawn that te, Audit buaipui leh Fund Monitor leh Vet te niin, an hnathawh leh mawhphurhna sanzia hriaa ‘Mipui leh Sawrkar tan eng thil thar nge ka ngaihtuah chhuah theih ang’ tih rilru pu turin a chah a. State dang leh ram changkang zawk ten hmasawnna hna engnge an thawh tih zir a, Mizoram tan lakluh theih ve dan a awm em tih te zawng a hma la mawlh mawlh turin a fuih bawk.

Deputy Chief Minister chuan Sawrkar sum inrelbawlnaah MF&AS Officer te chu an awmna hmun apiang ah thurawn pe thei tur khawpa inchhiar taima a, thahnemngaihna thar nena thawk turin a chah a. Mizoram Sawrkar sum enkawl hna (Financial Management) chu an kuta a awm avangin rinawmna nena thawk tur leh Service hrang hrang te nen thawhhona tha a awm theih nan entawn tlaka awm turin a fuih bawk.

MF&AS Officer te hi kum 1976 atangin Mizoram Sawrkarin a la (recruit) a, Department leh Office hrang hrangah MF&AS Officer te inzarpharhin post hrang hrang 87 an chelh a ni.