C&I Minister in Mizoram a Industrial Unit-te khaichhuahna tura a bik taka tanpuina pe turin a ngen

Commerce & Industries Department changtu Minister Dr. R. Lalthangliana chuan Mizoram chu hripui in a nuai nat ber zinga mi a nih avangin Industry tenau (Micro Enterprises) te’n an tuar nasa em em tih sawiin, Mizoram a Industrial Unit-te khaichhuahna tura a bik taka tanpuina pe turin a ngen.

Sawrkar laipui-a Ministry of Ministry of Micro, Small & Medium Enterprises (MSME) bultumin tunkar Ningani khan North-East MSME Conclave chu Hotel Taj Vivanta, Guwahati-ah Union Minister for MSME Narayan Rane hovin neih a ni a, he hunah hian Mizoram atangin Commerce & Industries Department Minister Dr. R. Lalthangliana chu telin Minister hian Mizoram-a Industry te dinhmun leh COVID-19 hripui vanga Industrial Unit-ten harsatna an tawh hrang hrang te a sawi a. Mizoram chu hripui in a nuai nat ber zinga mi a nih avangin Industry tenau (Micro Enterprises) te’n an tuar nasa em em tih sawiin, anmahni chhanchhuahna tur Central Sawrkar atanga tnpuina pek an nih loh chuan Industrial Unit tam tak chu hnathawk chhunzawm thei lova khar mai hmabak an ni tih a sawi a. Hetiang a nih avang hian Micro Enterprise te chhanchhuahna tur Concept Note an siam thu leh MSME Ministry-ah an thehluh tawh thu sawiin, Union Minister chu Mizoram-a Industrial Unit-te khaichhuahna tura a bik taka tanpuina pe turin a ngen a ni.

Hei bakah hian DONER leh MSME Ministry-ah te pawisa a tam thu pawh Minister chuan sawiin, heti a nih rual hian Mizoram leh hmarchhak State te natna damdawi tak hi min la chawh thiam lo a ni, a ti a. Kalphung khirhkhan lutuka an siam chu hmarchhak State te tan bika thlahdul deuh a ngai tih sawiin, Central Guidelines ang diak diaka kal hi hmarchhak State hrang hrangah te hian a remchang lova, chhan hrang hrang a awm avangin kan State te ang tan chuan a bik deuh herrem a ngai a ni, a ti bawk.

He Conclave-ah hian India hmarchhak State hrang hrang atangin Commerce & Industries Minister-te telin Union Mister chuan sawrkar laipuiin hmarchhak State-te a ngaih pawimawh thu a sawi a. India ram puma MSMEs awm zingah za zela pakhat (1%) ang chauh hmarchhak-ah a la awm thu leh India Act East Policy chak zawka kalpui turin hmarchhak State-te tih hmasawn a pawimawh a thu sawiin, hmarchhak State ti hmasawn tur chuan hmarchhaka MSME te’n hma an sawn a ngaih thu a sawi bawk.

He CConclave-ah hian MSME Ministry hnuaia Scheme awm hrang hrangte tarlan a ni a. Heng Scheme hrang hranga hmarchhak State in harsatna a neihte sawilan niin Ministry Scheme te hi awlsam zawk leh rang zawka mipuiin an chhawr theih tura siamthat an duh thu leh PMEGP diltu te’n Bank lama harsatna an neih thin thu hmar-chhak Minister-te hian an sawichhuak a ni.

Dr. R. Lalthangliana hian Union Minister hi a hran a hmu lehin MSME a an proposal thehluh chungchang khunkhan takin a sawipui bawk a ni.