Latest News

Chanchin thar thenkhat :

Dr. ZR. Thiamsanga’n hawng

Health & Family Welfare Board Vice Chairman leh Champhai South bialtu MLA Dr. ZR. Thiamsanga chuan MLA Fund Rs. 13,00,000/- senga Ngur Village Development Committee in an sak Ngur Bazar Shed leh Model Village Office te chu nimin khan a hawng a, Land Development atana District pathum zinga khaw thlan ah a bial chhung khaw pahnih, Hnahlan leh Ngur te an tel thu sawiin, Ngur khaw ram hausakna lachhuak thei tura bultana hmachhawp tam tak neih tum a nih thu a sawi bawk. Dr. ZR. Thiam-sanga hian nimin vek khan Ngur Community Hall-ah MZP Ngur Branch buatsaih Zirlai tithate chawimawina hun hmanpuiin Zirlai hlawhtlinna chang Memorial Award 2 leh Special Award 1 tiamin mi 36 te hnenah chawimawina thuziak a hlan a ni.


Champhai DC in hawng

Indona avanga ram leh hnam tana nun hlantu te hriatrengna leh zahna lantirna lungphun (War Memorial) Champhai DC hmunhlui-a siam an cheithat chu nimin zing khan Champhai DC leh Zila Sainik Board (ZSB) Chairman Maria CT. Zuali chuan a hawng a, he War Memorial hi kum 1997 khan tuna DC hmun hluiah hian siam niin DC Office leh District Sainik Welfare & Resettlement Office hmalakna in Rs. 1,50,000/- in siamthat a ni a, War Memorial lungphunah hian indopui pakhatna leh pahnihna bakah India ramin zalenna a neih hnu indona hrang hranga ram leh hnam tana nunna hlu tak hlantu sipai 17 te hming a chuang a, remchang hmasa berah mi pakhat ziahluh belh tura ruahman a ni.


Raltlan te awmna hmun tlawh

Lawngtlai East bialtu MLA leh Agriculture Development Board Vice Chairman, H. Biakzaua chuan Myanmar atanga Mizoram-a raltlan te Lawngtlai-a an awmna Trade Facilitation Centre leh Lawngtlai Vengpui leh Council Veng-a raltlan te awmna tur sak mek chu a tlawh a, tanpuina pawisafai bakah buhfai leh chawhmeh te a hlan.


Hualngohmun-ah MNF VC

MNF Vice President Lalthlengliana chuan nimin khan Hualngohmun atangin MNF Party zawm thar mi 74 lawmlutin heng zingah hian Congress atangin VC Vice President nilai leh ZPM atangin VC Treasurer nilai te an tel tih MNF chuan thuchhuah siamin an tarlang a. Hualngo-hmun ah hian Party dang te nen thawkho in MNF VC chu ding sa mah se tunah chuan MNF hlang VC a ding ta niin an tarlang bawk. He hunah hian MNF Vice President chuan kum 2023 inthlanpui lo awm turah Pathian in MNF a sawr-kar tir leh ngei dawn niin a sawi bawk.


BJP in DoNER Minister hmu

BJP Mizoram Pradesh State Vice President JB. Rualchhinga leh hruaitu dang te chuan Ningani khan MoS for DoNER Dr. Jitendra Singh chu New Delhi-ah hmuin Mizoram a hmasawnna hna hrang hrang leh Development hnathawh kawnga a harsatna hrang hrang a tawh mek te bakah Mizo-ram Political Issue te an sawipui a. Dr. Jitendra Singh chuan DoNER Ministry a lo enkawl tawh avang leh PMO I/C a nih angin, Mizoram a hna kal mek te pawh a hriatchian thu a lo hrilh a, Political Issue pawh a tul anga hmalakpui dan tur a lo ngaihtuah tur thu alo hrilh a ni.

Comments

Popular News (Last 30 Days)