Latest News

Khaw pahnih hmun khuahkhirh bikah puan an ni

Serchhip District Bawrhsap Kumar Abhishek IAS chuan tunhnaia Serchhip District chhunga COVID-19 hri kai hmuhchhuah tamna Leng khua leh Chekawn khua te chu COVID-19 hri darh zel thei dinhmunah a ding nia a lan avangin hmun khuahkhirh bik (Restricted Area) atan a puang a. Chekawn khua ah hian tunhnaiah hri kai mi 20 lai hmuhchhuah ni tawhin enkawl dam an awm chho tan mek a, Leng khua ah hian hri kai mi 52 hmuh ni tawhin enkawl dam an la awm lova, hri kai te enkawlna atan hian 4C pahnih siam a ni bawk.

COVID-19 hri kai 497 hmuhchhuah belh an ni

Niminpiah khan Mizoram-ah COVID-19 hri kai 497 hmuh leh niin heng te hi Sample enfiah 3692 atangin a ni a, Sample enfiah atanga za zela 13.46 te chuan hri an kai a ni.

Niminpiah khan ZMC-a RT-PCR Laboratory-ah Sample 329 enfiah niin heng atang hian hri kai mi 48 hmuh an ni a, an vai hian Aizawl District-a Sample lak vek an ni. Fluorescent Immunoassay Test hmangin Aizawl-ah Sample 14 enfiah niin hri kai mi pakhat hmuh a ni bawk a, Aizawl mi bawk a ni.

Aizawl leh Hnahthial tihloh District dang zawnga TrueNat Laboratory-ah niminpiah khan Sample 210 enfiah niin hri kai mi 53 hmuh an ni bawk a, an zinga 27 te chu Lunglei District atanga hri kai hmuh te niin Serchhip District-ah 15, Champhai District-ah 5, Mamit District-ah 3, Khawzawl District-ah 2 leh Siaha District-ah pakhat te an ni.

Rapid Antigen Test hmangin niminpiah khan Sample 3319 enfiah ni bawkin hri kai mi 395 hmuh an ni bawk a, an zinga 151 te chu Aizawl District-a hri kai hmuh te niin Khawzawl District-ah 73, Serchhip District-ah 60, Champhai District-ah 33, Mamit District-ah 26, Kolasib District-ah 19, Lawngtlai District-ah 13 leh Hnahthial leh Saitual District-ah 10 ve ve te an ni.

Nimin khan Mizoram-ah COVID-19 hri kai enkawl dam mi 302 awm belh lehin heti hian nimin tlai dar 5:00 thlenga Mizoram-a hri kai hmuhchhuah chu 1,30,912 niin an zinga 1,25,472 te chu enkawl dam an ni tawh a, hri kai hmuhchhuah atanga zaa 95.84 te enkawl dam ni tawhin hri kai enkawllai 4965 an la awm a ni. Nizan hmasa khan hri kai boral pakhat awm belhin nimin khan mi 2 an boral leh bawk a, Mizoram-a hri kai zingah mi 475 an boral tawh a ni.

Comments

Chhiar Hlawhte

Book of the Year hlan