Mizoram pum huap Boxing inelna Serchhip-ah nei dawn

Mizoram State Boxing Championship 2021 chu tun thla ni 29 atang khian Serchhip-ah khelh a ni dawn a, hemi chungchang ngaihtuah hian nimin khan Serchhip-ah Organising Committee chu an thukhawm.

He thutkhawm Serchhip DC Meeting Hall-a neih hi Organising Committee Chairman leh District Bawrhsap Kumar Abhishek chuan kaihruaiin Serchhip Boxing Hall-a Mizo-ram pum huap Boxing inelna liantham nghah a ni tur chu lawmawm a tih thu sawiin, a tha thei ang bera inbuatsaihna kalpui a nih tur thu a sawi a ni.

He thutkhawm ah hian Working Committee Chairman leh Serchhip District Boxing Association (SEDBA) President Kapliana Pachuau chuan he inelna neih tur atana an inbuatsaihna hrang hrangte tarlangin, COVID-19 hripui leng avanga inelna neih mumal theih a nih loh hnuah SOP-a inelna neih theih dan ruahman a nih tak avanga neih tum a nih thu leh hri leng avanga mikhual insemdarh te a remchan loh avangin hmun khat-a Boxer leh Official te an thlenkhawm theihna tur hmun, Serchhip chu thlan a ni tih a sawi a ni.

He thutkhawm a tel te hian Boxer leh Official rawn kal turte chu an awmna District atangin COVID-19 Negative Certificate nei sa a lo kal turin an ngen a, SOP Implementing Committee dinin sawrkarin inkaihhruaina a siam zawm leh zawm lo nitin an vil thin dawn a ni. He Boxing Championship hi D-3 Business Enterprise in Main Sponsor nihna an hauh avangin ‘D-3 Business Enterprise Mizoram State Boxing Championship-2021’ tih a ni dawn a, a hawnna ah khuallian atan Law & Judicial Minister TJ. Lalnuntluanga leh a kharna ah Sports Minister Robert Romawia Royte te chu sawm an ni ang.