Lenkawl

Mizoram Pradesh Congress Youth Committee (MPYCC) chuan Health Minister Dr. R. Lalthangliana chu a hna chanpual a tlin ngang lo a nih chuan bang ngam mai se an ti .

Non-Government Hospital Association of Mizoram chuan Thisen lak dan chu a awlsam thei ang berin damdawi In thliar hrang lovin siam leh thuai an duh thu an sawi.

Assembly Deputy Speaker, Er. Lalrinawma chuan Citizenship (Amendment) Bill chu tuman an duhlo nia sawiin, “Kan duh dan ang ngeiin Mizoram kan tel ve lohna turin an siam tha a, kan duh anga Bill an siam that avangin kan vote ta a ni,” a ti.

Nimin khan Mizo Zirlai Pawl (MZP) leh North East Students Organisation (NESO) hmalaknain Aizawl khawpui chhung hmun hrang hrangah CAB/CAA dodalna avanga North East Zirlaite zinga nunna chan leh tuar te thlavang hauhna lantir nan Flag dum tar a ni.

February ni 13 atanga 16, 2020 chhunga Mizoram-in Serchhip-a thlen tur, Paragliding Accuracy World Cup, 2020 atana inbuatsaihna kalpui chhunzawm zel a ni a. Nimin khan Organising Committee Co-Chairman, Esther Lalruatkimi, Tourism Secretary hovin a pisa-ah Organising Committee thutkhawm neih a ni.

Tun thla ni 26-a India Republic Day lo thleng tur chu Pathianni a nih avangin Serchhip-ah pawh zingkar-ah hman a ni dawn a, khuallian atan Serchhip District Bawrhsap chu beisei a ni.

Hmeichhia, hleilenna chi hrang hrang tawk ten an mamawh hun apianga an pan theih tur, 'One Stop Centre' chu Serchhip-a hawn a nih hnuah nikum kumtawp thleng khan mi thahnem takin panin he Centre pantu tam ber te hi pasal te kut tuar an ni.

Mizoram State Election Commission chuan Mara Autonomous District Council (MADC) hnuaia VC thiah, member bang leh member tanglai boral an awm avangin heng hmun ruakah tun thla ni 31 khian by-election neih a nih tur thu thuchhuah siamin a tarlang a.

Congress |halaite chuan MNF sawrkar chu ram leh hnam phatsan zawnga chet la zelah puhin, MNF Party chu Mizo Nationalism chu vawikhat mah sawi ve tawh lo turin a chah a ni.

Lawngtlai District Land Owners Association Office Bearer Meeting nimin-a neih chuan KMMTTP kawngpui sial hna kal mek chu tiamchin awm lova chawlhtir nise an ti.

Mizoram State BJP President thlan thar, Vanlalhmuaka chuan nimin khan Aizawl-a BJP Office, Upper Republic-ah Chanchinthar lakhawmtute kawmin thingpui inpuina a nei a, kumthar a BJP kal zel dan tur leh hmachhawp hrang sawi chhuahna hun a nei.

Mizoram sawrkar chuan Civil Hospital Blood Bank atanga thisen la thinte tan kalphung thar, a hmaa mi ang lo hlekin a siam a. Hemi ang hian mimal leh eng Hospital pawh Civil Hospital atanga thisen la turte chuan thisen an lakchhuah dawn reng rengin Director, Hospital & Medical Education hnen atangin phalna lak zel tawh tur a ni.

Tuipuiral Zirlai Pawl (TZP) General Conference Vawi 35-na chu nimin khan Dungtlang Community Hall-ah I&PR Minister, Lalruatkima chuan khuallian niin a hmanpui a. East Tuipui bialtu MLA leh Bamboo Link Road Board Vice Chairman, Ramthanmawia pawhin a khual zahawm niin a hmanpui bawk.

Krismas leh Kumthar vuakvetah Mizoram Pollution Control Board (MPCB) in boruak bawlhhlawh dan leh ri bengchhen dan a tehnaah Aizawl-a sang a, a bik takin Sikulpuikawn chu tehna ah a sang thei hle.

Mizoram Public Service Commission (MP-SC) in Mizoram sawrkar AH&Vety Department hnuaia Junior Grade of MAH&VS a lak thar mi 4 zingah Serchhip atangin George Martin Lalruattluanga s/o David Laldintluanga, New Serchhip chu a tel.

UD&PA Department hnuaia Serchhip District Urban Development Officer (DUDO) Office-a thawk te chuan nimin khan kumthar atana inhlantharna hun an Office-ah an nei a, he hun hi Serchhip DUDO, Vanthangpuii chuan kaihruaiin he hun hmanpuitu BCM New Serchhip bialtu Pastor, Rev. VL. Nithanga chuan he Office-a thawk te chu Pathian nena thawkdun tur leh chu chu an nun-ah pawh langchhuak tur a nih thu a sawi a, an hnathawh avangin Serchhip in Pathian malsawmna a dawn theih thu pawh sawiin, rin-awmna nena an hna thawk turin a chah bawk.

MJA leh Zonet Cable TV in 'Miss Mizoram, 2020' thlanna a neih turah Serchhip District-a tel duhte tan tun thla ni 18 thleng dilna thehluhna hun hawn a ni.

BJP Mizoram State hruaitu thlanna neih ah President thar atan Vanlalhmuaka chu thlantlin a ni.

Mizoram sawrkar Excise & Narcotic Department in ‘The Mizo-ram Liquor (Prohibition) Rules, 2019’ an siam chu peih a ni tawh a, Mizoram sawrkar-in notification a chhuah hunah hman theih chauh a ni ang.

Electoral Roll Special Summary Revision neih meka Kolasib District tana Observer, Lalthangpuia chuan Kolasib tlawhin an hmalakna te a enfiah.