Hnam phatsan a che ah puh

Congress |halaite chuan MNF sawrkar chu ram leh hnam phatsan zawnga chet la zelah puhin, MNF Party chu Mizo Nationalism chu vawikhat mah sawi ve tawh lo turin a chah a ni.

Nimin-a thuchhuah an siamah Mizoram Pradesh Youth Congress Committee (MPYCC) chuan MNF Sawrkar tirh khan Party Manifesto, Mizoram Governor meuhin, Khawvel hmun hrang hranga Zofate insuihkhawm a, inunau zualnan Khawvel Hmun 10 ah 'Zo KUTPUI' neih tum a nih tur thu a sawi nia tarlangin, hemi bawhzuina ni awm tak hian January ni 9-11, 2020 hian Chief Minister, hovin Vanghmun, Zampui Tlang-ah 'Zo Kutpui' hman a nih dawn thu leh hemi zawh hian Tahan leh Churra-chanpur-ah neih tum nia sawi niin, Zofate awmna hmunah hman zel tum nia sawi a ni bawk, an ti a.

Hetiang anih lai hian kan unaute nena indaidanna bang, BJP sawrkarin a siam mek thu leh kan inkalpawha, kan intlawhtawn kawnga harsatna turin ruahmanna a siam mek nia tarlangin, Zofate CAA dodalnaa kan inlungrual em em laiin, MNF Sawrkar chuan BJP Sawrkar malsawmna dawn beisei vangin BJP duhdan an thlawp thu leh ram leh hnam an phatsan thu an sawi a. Zoram aiawha India ram rorelna sanga \hu, Lok Sabha MP, C. Lalrosanga pawhin Mizo mipuite duhdan hnawlin Parliament House chhungah ngei Mizo hnam a phatsan nia tarlangin, MNF Sawrkarin India ram, Hindu rama siam tumtute thiltih thlawpa ram leh hnam pawi a khawih duh ta mai chu pawi an tih thu an tarlang.

MPYCC chuan BJP sawrkar chuan Zohnah-thlak unau ramdanga chengte nena kan inkar kak tizau lehzual turin National Register of Citizen (NRC) Dan siam turin ke a pen zel bawk nia tarlangin, hetiang ang dinhmuna ram leh hnam a din mek laia MNF Sawrkarin a dodal zawng nilova, a thlawp zawng leh ram leh hnam phatsan zawnga chet ala zel chu an dem thu an sawi bawk.