Serchhip-a ‘One Stop Centre’ pantu zingah mahni pasal te kut tuar an tam ber

Hmeichhia, hleilenna chi hrang hrang tawk ten an mamawh hun apianga an pan theih tur, 'One Stop Centre' chu Serchhip-a hawn a nih hnuah nikum kumtawp thleng khan mi thahnem takin panin he Centre pantu tam ber te hi pasal te kut tuar an ni.

Serchhip-a 'One Stop Centre' hi nikum Sept. 11 khan hawn niin hmeichhia Inchhung khur leh khawtlang-a hleilenna hrang hrang tawk ten an mamawh hun apianga an pan theih tura ruahman a ni a, he Centre hawn a nih atanga nikum kumtawp thleng khan hmeichhia harsatna tawk mi thahnem takin panin heng te hi a tul anga buaipuia enkawl niin an zinga mi 8 te chu he Centre pantu a ziahluh an ni a, heng mi 8 zingah hian pasal te kut tuar tam berin mi 5 te chu pasal te kut tuar avanga he Centre pan hi niin midang 2 te chu an pasal te nilo mipa dang rikrapna tuar leh hursualna laka harsatna tawk niin midang pakhat hi belh tur bik neih loh avanga helai hmun hi pan a ni thung a, heng mite hi an mamawh ang chaw leh ei tur dang bakah an mamawh hrang hrangte lo pek niin a tul angin Counseling pek an ni bawk a, pasal kut tuar te hi an pasal te pawh koh niin a tul anga Counseling pek ve an nih bakah he Centre atanga an chhuah hnuah pawh a theih angin an chanchin hi ngaihchan zui zel a ni bawk.

'One Stop Centre' enkawltute chuan 'One Stop Centre' chu hmeichhia, tihduhdah tuar (domestic violence) te tana tlanluhna tura duan niin a tul dan ang zelin Centre thawktute hian an lo tanpui thuai (quick response) thin tih an sawi a, helai hmun pantute chu an khawsakna atana an mamawh hrang hrangte a thlawna pek thin an nih thu leh a tul a nih chuan riahna te pawh ngaihtuah sak an nih bakah helai hmunah hian zan 5 thleng awm thei tura ruahman a nih thu sawiin, an fa te pawh a tul anga an riahpui theih thu leh harsatna tawk hmeichhia te hian an duh a nih chuan FIR te an thehluh sak theih bakah Court lam thleng pawha an buaipui theih thu an sawi a, amaherawh chu tun thlenga he Centre rawn pantu zingah hian FIR thehlut an la awm loh thu leh helai hmun pantu zingah enkawl mek an neihloh thu an sawi bawk.

Serchhip-a 'One Stop Centre' tur hi P&E Veng-ah building sak mek a ni a, building hi peihfel a nih hma chu Serchhip DC Office chhawng chung berah an awm tih a, tunah hian thawktu hi Administrator Lalchhanhimi leh midang 8, an vaiin mi 9 an awm mek a, a mamawhtute tan Phone Number 8415049957-ah leh 8974582937 ah te biak theih reng an ni.