BJP Mizoram President thar in BJP kal zel dan tur leh an hmachhawp hrang hrang a puang

Mizoram State BJP President thlan thar, Vanlalhmuaka chuan nimin khan Aizawl-a BJP Office, Upper Republic-ah Chanchinthar lakhawmtute kawmin thingpui inpuina a nei a, kumthar a BJP kal zel dan tur leh hmachhawp hrang sawi chhuahna hun a nei.
Mizoram State BJP President, Vanlalhmuaka chuan, Mizoram chhungah BJP member mi 70,000 chuang an awm mek thu sawiin, heng zinga member 66,000 te chu Digitalize a ni tawh thu a sawi a. Active member 770 record neih mek a nih thu leh hun remchan veleh digitalize a nih tur thu a sawi bawk. Mizoram-ah Block (Mondal) 40 an neih theih thu leh chutih a nih rualin Block 21 a awm mek thu a sawi sawiin, BJP chu inrelbawlna felfai tak hnuaia inkaihruai an nih thu a sawi a. Party chhung inrelbawlna hrang hrang an tihfel hnuah Scheme chi hrang hrang dawng thei tur zawngin bul an tan dawn thu a sawi bawk a. “Kum 75 dawn ramchhung zalen kan ni tawhah chenna In neilo leh electric Eng hmu pha lo an la awm a. Kum 75-na champha ah chenna nei lo tan chenna In kan siam anga, Electric Eng neilo te eng pek vek a ni tawh dawn a ni,” a ti bawk.
Hei bakah hian Mizoram BJP President chuan Union Home Minister hnenah Mizoram hmasawnna tur kawng hrang hrang Memorandum thehluh a nih tawh thu leh chungte chu, Mizoram leh Assam ramri chungchangte, Mizoram-a AIIMS awm theihna tur atan hmalakte, Lengpui Airport chu International Airport ni thei tura siam len te, Kaladan Hydro Power Project (700 MW) siam puitlin te, kawngpui tha zawk nei tura hmalakna, Aizawl leh Silchar inkar 4 Lane National Highway te, Lawngtlai atanga Dhaka, Bangladesh pawh tur kawngpui siamte, Kaladan Multi Modal Trade and Transit (KMMTT) Project tih puitlin bakah IIT, IIM leh Engineering College Mizoram chhunga a awm theihna tura hmalak te, Mizoram chhimlam Mampui Airport siamte leh International Trade Centre, Zochachhuah siampuitlin thuai te chu hmalaka bawkzui mek a nih thu a sawi.
Zawhna chhangin State BJP President Vanlalhmuaka chuan Mizoram-a BJP an sawrkar theih dan tur a sawi a. Member mi 70,000 te zinga pakhatin mi pahnih zel hruailuh an tum anga, heng zawng zawng tihpuitlin theih a nih chuan Mizoram ah BJP in sawrkarna an chang ang, a ti bawk.
Nimin a BJP President thar in thuthar thehdarhtute a kawmna hun hi Rev. LR Colney chuan a kaihruai a, Nirupam Chakma Ex Minister leh National Council Member Mizoram chuan a tawiawm a. District hrang hranga BJP hruaitute inkawmhona ah an tel bawk a ni.

Comments

Chhiar Hlawhte