CAB hi tuman kan duh lo - Deputy Speaker

Assembly Deputy Speaker, Er. Lalrinawma chuan Citizenship (Amendment) Bill chu tuman an duhlo nia sawiin, “Kan duh dan ang ngeiin Mizoram kan tel ve lohna turin an siam tha a, kan duh anga Bill an siam that avangin kan vote ta a ni,” a ti.

Tun thla ni 7-9 chhunga Pang Zirlai Pawl (PZP) General Conference vawi 33-na chu Chamdurtlang-ah neih a hmanpuina ah he thu hi sawiin Assembly Deputy Speaker chuan “CAB hi tuman kan duh lova, kan Chief Minister zahawm tak pawhin central a dawr a. Chung kan duhlohna te chu min ngaih pawimawh sakin Mizoram min telh ta lova, kan lawm hle a ni,” a ti a. “Kan Chief Minister zahawm takin a lo sawi tawh angin, CAB pawh kan duh dan ang ngeiin Mizoram kan tel ve lohna turin an siam tha a, kan duh anga Bill an siamthat avangin kan vote ta a ni. Mi tam takin kan MP kan um zui luih luih a, hei hi pawi ka takzet a ni. Anti Defection Law, paragraph 2(b)-in a sawi angin, party hminga thlantlin MLA leh MP te hi party duhdan kalha an awm a rem lova, party-in whip a pek angin kan MP pawhin chutiang chuan a vote mai a ni a, party whip kalha a vote a thiang lo a ni,” a ti bawk.

Assembly Deputy Speaker chuan mihringte chu kan rilru puthmang in kan thlen chin tur a hril tih sawiin, “Keini zirlaite pawh kan rilru puthmang a san chuan kan thlen chin pawh a sang mai dawn a ni,” a ti a. “Zohnahthlak hnam hrang hrangte'n hma kan sawn loh chuan a Mizo angin hma kan sawn dawn lova. Zohnahthlak hnam hrang hrangte hian kan hnamzia, kan nunphung, kan tawngte leh kan hmunhma te kan inzahsak tawn a pawimawh hle a, kan tawngte pawh kan zahpui tur a ni lo. Pathian in hnamdang ngaisang tura a din kan ni lova, a hranpaa siam kan ni. Keimahni leh keimahni kan inngaihsan loh chuan, kan ram luahah pawh kan buai mai a ni,” a ti bawk.