Krismas leh Kumthar vuakvet-ah boruak bawlhhlawh leh ri bengchheng a nasa - MPCB

Krismas leh Kumthar vuakvetah Mizoram Pollution Control Board (MPCB) in boruak bawlhhlawh dan leh ri bengchhen dan a tehnaah Aizawl-a sang a, a bik takin Sikulpuikawn chu tehna ah a sang thei hle.

MPCB chuan kum 2019 chhung kumtluan-a Mizoram boruak dinhmun a zirchian tawh hnuin Krismas leh kumthar vuakvêta boruak dinhmun hriatchian nan December 24 leh 31 khan boruak tehna hmun a neihsa hmun hrang hrang Aizawl, Lengpui, Lunglei, Champhai leh Kolasib-ah te boruak endik hna a kalpui leh a, zirchianna in a tarlan danin District dangah danglamna a awm em em lo a, boruaka bawlhhlawh nâwi leng vel (PM10) chu December ni 24-ah Station dangah standard 60µg/m³ (microgram per metre cube) a pelh loh laiin Sikulpuikawn-ah chuan kum 2018-a 63µg/m³ aiin a sang zawk a, kum 2019-ah chuan 93µg/m³ a kai pha a ni.

December 31, 2019-ah erawh chuan Laipuitlang tihloh hmun dang Sikulpuikawn, Dawrpui leh Bawngkawn-ah chuan standard 60µg/m³ an pel vek a, Sikulpuikawn-ah kum 2018-ah 101µg/m³ a nih laiin kum 2019-ah chuan 109µg/m³ a ni thung a. Dawrpui-ah kum 2018-ah 63µg/m³ a nih laiin kum 2019-ah chuan 95µg/m³ ah a kai chho bawk a ni. Bawngkawn-ah kum 2018-ah 41µg/m³ chauh a nih laiin kum 2019-ah chuan standard pelin 63µg/m³-a tling pha hial a ni. 

Boruak bawlhhlawh Gas lam chi, Nitrogen Dioxide (NO2) hi December 31, 2018 zing dar 6:00 atanga a tuk Jan. 1, 2019 zing dar 6:00 inkar khan Sikulpuikawn-ah 12.9µg/m³ leh Dawrpui-ah 10.3µg/m³ a nih laiin December 31, 2019 zing dar 6:00 atanga a tuk, Jan. 1, 2020 inkar khan Sikulpuikawn-ah 13.7µg/m³ leh Dawrpuiah 13.2µg/m³ a ni a, Station dangah erawh chuan teh thamloh (BDL) a ni thung. Boruak bawlhhlawh dan leh hriselna a nghawng theih dan, Air quality Index (AQI) hmanga tehin Dawrpui leh Bawngkawn hi hemi hun chhung hian mi âwmnêm deuh tan thâwk harsatna a thlen theih avangin a hrisel lo a, Sikulpuikawn phei chu Chuap leh Lung natna nei emaw, Lung thalo emaw, naupang leh upa lam tan a hrisel lo lehzual a ni. 

Aizawl khawpui Veng pali- Sikulpuikawn, Dawrpui, Bawngkawn leh Laipuitlang-ah te ri rin dan (Ambient Noise level) teh a ni bawk a, a tlangpuiin ni pangngai (normal day) aiin kum 2019 December ni 31 leh January ni 1, 2020 inkar chhung khan thawm bengchheng a tam zawk a. Kumhlui thlah zana boruak bawlhhlawh lo pung chho chu halpuah hal nghawng a nih ngei a rinawm tih Mizoram Pollution Control Board chuan a tarlang bawk.