Thisen lak danah damdawi In thliar duhlo

Non-Government Hospital Association of Mizoram chuan Thisen lak dan chu a awlsam thei ang berin damdawi In thliar hrang lovin siam leh thuai an duh thu an sawi.

Nimin a thuchhuah an siamah Non-Government Hospital Association of Mizoram chuan Mizoram Sawrkar in damlo thisen pek ngai te Blood Bank atanga Thisen lak dan kalphung thar a siam chu damlo thisen mamawh, nunna derthawng taka a awm te tan a thalo an ti tih sawiin, “Director, Hospital & Medical Education kaltlang a lak angai hi a kawng a thuiin damlo leh an chhungte tan harsatna nasa tak a siam a ni,” an ti a. Thisen (Blood) chu nunna chhanna a nih avangin tumah in a tul lovah an dawng lo tih sawiin, “Hospital te mamawh ni lovin damlo mamawh anih avangin NGHAM chuan Thisen lak dan hi a awlsam thei ang berin damdawiin thliar hrang lovin siam leh thuai nise kan ti,” an ti bawk.

Hei bakah hian NGHAM Hospital te leh sawrkar an la inrem theih loh avanga damlo mangang, Hospital awm ngai tam zawk in Medical Reimbursement leh Mizoram Health Care Scheme an chhawr thei rih lo pawh pawi an tih thu sawiin, Sawrkar in an ngenna a tihhlawhtlin hma a harsatna tawk te hriatthiamna an ngen bawk.