I&PR Minister in Tuipuiral Zirlai Pawl General Conference Dungtlang-ah a hmanpui

Tuipuiral Zirlai Pawl (TZP) General Conference Vawi 35-na chu nimin khan Dungtlang Community Hall-ah I&PR Minister, Lalruatkima chuan khuallian niin a hmanpui a. East Tuipui bialtu MLA leh Bamboo Link Road Board Vice Chairman, Ramthanmawia pawhin a khual zahawm niin a hmanpui bawk.

Dungtlang khuaa Tuipuiral Zirlai Pawl (TZP) General Conference Vawi 35-na hman mekah hian 'Zirlaite leh tunlai khawvel' tih chu thupui atan hman niin he hun hmanpuitu I&PR Minister, Lalruatkima chuan Tuipuiral khua te chu khaw inthurual leh nuam tak anih thu sawiin, amah ngei pawh a inthlahrung loh thu leh nuam a tih thu a sawi a. Tuipuiral chu miropui tak tak te lo chawrchhuahna hmun a nih thu sawiin, an thachhang dawltu tur awmloh a hlauhawm thu sawiin, Zirlaite chu an hniakhnung zui ve thei tura tan la sauh sauh turin a fuih a. A thiam leh hmangchang hriate dinchhuah zelna khawvel a kan awm avangin kan elpuite laka dingchanga hlawhtlinna chang tur chuan kan hriam ve tawk angai a ni, a ti.

Nimin a TZP General Conference hi East Tuipui bialtu MLA leh Bamboo Link Road Board Vice Chairman, Ramthanmawia pawhin khual zahawm nia hmanpuiin Sawrkar thar hun reilote chhungin Minister hrang hrang ten East Tuipui bial ngaipawimawha an tlawh thin avangin lawmthu a sawi a. Tunhnai maia Dungtlang Police Out Post, Police Station puitling a hlankai a ni chu lawmawm a tih thu sawiin, sawrkar hotute duhsakna leh ngaihsakna a fak a. PHC Farkawn sakthat anih theihna turin Tribal Affairs Ministry atanga phalna hmuh anih thu leh sakthat ngai dang 3 te pawh a tul ang zela bawhzui tum a ni, a ti a. A Bial chhung mipuite hriselna kawnga mamawhte a tul anga bawhzui zel a nih thu sawiin, Farkawn PHC-ah bial mipuite hman theih turin Ultrasound khawl bunfel anih thu leh Sawrkar laipui School tha, Eklavya Model Residential School (EMRS), pawl 6 atanga 12 thlenga a thlawna zirna, naupang 200 len theihna tur pawh cheng vbc. 24 sengin Khawbung-ah din tum a ni, a ti bawk.

He hunah hian kum 2019 chhunga High School leh Higher Secondary School-a Zirlai First Division chin chunglam a pass te, Bachelor leh Master Degree neite, HSLC Exam-a 100% School pass zirna In 3 te leh Special Award dawngtu 7 te chawimawina neih a ni a. Chawhnu lamah thupui zirna hun neih niin 'Zirlaite leh tunlai khawvel' tih thupui zirhona neih a ni bawk.

TZPhi kum 1986 a din niin, 'Learn for Wisdom' tih chu an thupui ber a ni a, East Tuipui bial khaw hrang hrang 25 atanga intelkhawm zirlai pawl lian ber niin nakum-ah Khankawn khuain a thleng dawn a ni.