CAB/CAA dodalna avanga tuar NE zirlaite thlavang hauh nan MZP in Aizawl-ah Flag dum an tar

Nimin khan Mizo Zirlai Pawl (MZP) leh North East Students Organisation (NESO) hmalaknain Aizawl khawpui chhung hmun hrang hrangah CAB/CAA dodalna avanga North East Zirlaite zinga nunna chan leh tuar te thlavang hauhna lantir nan Flag dum tar a ni.

Nimin-a he hnatlanga thawkchhuakte hian MZP Pisa Pui kawtah programme tawi hmangin he huna thu sawitu MZP General Hqrs. General Secretary, Lalnunmawia Pautu chuan CAB, CAA ni ta chu dodalna tam tak karah pass anih avangin, North East State mai nilo, hmun hrang hrangah dodalna neih a nih thu a sawi a. CAA dodalna vanga Tripura State a Zohnahthlak pui boral chu MZP in a tawrhpui takzet tih sawiin, heng zawng zawng thlen tir tu leh a bultumtu chu Central Sawrkar BJP an nih thu sawiin, “CAA pass anih hnua dodalna vanga Central zirna In hrang hrangah Mizo zirlaite bakah North East zirlaite thisen chhuah bakah man hial tawk an awm chu MZP chuan central Sorkar BJP chet dan chu a dem tak zet a. MZP chu Mizo zirlaite tana ding anih angin, Mizoram chhung leh pawn thlenga zirlaite harsatna leh buaina chu a enliam mai dawnlo a, zirlaite tan MZP chu a ding zel dawn a ni,” a ti.

He hunah hian NESO Fin. Secretary, Ricky Lalbiakmawia chuan CAA chu pass tawh mah se NESO chuan a tawp thlengin a dodal zel dawn tih sawiin, “NESO chuan CAA chu Supreme Court-ah a khing mek a. January 22 khian Supreme Court chuan a ngaihtuah dawn,” a ti a. Court hian dan phuahchawp CAA chu a hnawl ngei theihna turin Mizo mipuite tawngtaina a hre reng turin a sawm a. NESO chuan North East State zirlaite thlavang hauh nan N.E State zawng zawngah Flag Dum tar hnatlang hi vawiin hian a nei a ni," a ti.

He hunah hian Lawmsangzuali, JNU zirlai chuan MZP ten phailam-a Zirlaite harsatna an hriatthiampui bakah, Delhi Police te chet dan demna leh kut an thlak avanga an tawrhpuizia lan-tirna leh thlavang hauhna atana NESO ten North East puma Flag Dum an tar chu thlamuanthlak a tih thu a sawi bawk. Hemi hnu hian hmun hrang hrangah Flag dum hi an tar a ni.