Republic Day hman dan tur ruahman fel a ni

Tun thla ni 26-a India Republic Day lo thleng tur chu Pathianni a nih avangin Serchhip-ah pawh zingkar-ah hman a ni dawn a, khuallian atan Serchhip District Bawrhsap chu beisei a ni.
Tun thla ni 26-a India Republic Day lo thleng tur Serchhip-a hman dan tur ngaihtuah hian nimin khan Serchhip DC Meeting Hall-ah sawrkar mi pawimawhte leh khawtlang hruaitute an thukhawm a, he Meeting hi District Bawrhsap mawhphurhna la mektu Chuauhnuna chuan kai-hruaiin kalkhawmte Kumthar Chibai a buk bakah an hnathawhna ah duhsakna a hlan a. Republic Day hlawhtling taka hman a nih theih nana uluk taka ngaihtuahna seng tur leh mawhphurhna an pek te tha taka hlen tum theuh turin kalkhawm te a ngen a ni.
He Meeting-a tel te hian Serchhip-a Republic Day lawmna hi DC Playground, Khawtetlang-ah zing dar 7:00-a neih tur tura relin District Bawrhsap chu khuallian atana beisei a ni a, Parade Contingents ten Hnam Puanzar chibai bukna an nei bawk anga. He Ni atan mawh-phurhna hrang hrang insem nghal a ni bawk.
Ruahman dan chuan Republic Day denchhen hian kumdanga lo tih thin tawh angin Volleyball Tournament buatsaih a ni ang a, he Ni pual thilpek pawh Home leh Hospital hrang hrangah te pek an ni bawk ang. Hemi Ni hian zing Ni chhuah rualin sawrkar Pisa tinah Hnam Puanzar zar a ni anga, DC Playground-ah hun hman bak hi Programme dang ruahman belh lovin VIP at Home programme pawh neih a ni lovang.

Comments

Chhiar Hlawhte