Paragliding Accuracy World Cup atan hma la zel

February ni 13 atanga 16, 2020 chhunga Mizoram-in Serchhip-a thlen tur, Paragliding Accuracy World Cup, 2020 atana inbuatsaihna kalpui chhunzawm zel a ni a. Nimin khan Organising Committee Co-Chairman, Esther Lalruatkimi, Tourism Secretary hovin a pisa-ah Organising Committee thutkhawm neih a ni.
He thutkhawm ah hian Adviser to Chief Minister leh Organising Committee-a Patron ni bawk, C. Lalramzauva chuan Serchhip-a World Cup nghahna tur hmunhma tum li a tlawh tawh thu leh a hlawhtlin theih nan theihtawp chhuah mek a nih thu a sawi a. Esther Lalruatkimi pawhin Mizoram-in World Cup a thlen vawikhatna tur a nih angin he hun pawimawh tak hi hlawhtling taka neih a nih theih nan inbuatsaihna hun tlem te la awmah theihtawpa tan la turin mawhphurtute a chah a ni.
He thutkhawm ah hian mawhphurtu hrang hrangte hmalak tawh dan ngaihthlak niin an hmachhawp te sawiho a ni bawk a. Sum leh pai mamawh tur uluk taka rel niin sum hmuh tur beisei zat leh hmanna tur tlangpui duan a ni bawk.
Paragliding Accuracy World Cup, 2020-ah hian ram hrang hrang 30 atangin mi 120 vel tel thei tura beisei a ni a. Tun dinhmunah ram 13 atangin mi 60 an in ziaklut tawh a ni. Anni bakah hian Official engemawzat lo kal tura beisei an ni a. National level leh International level atangin a hmunhma thlithlai turin Technical Team 2 an lo kal dawn a ni.

Comments

Chhiar Hlawhte