MLP Rules, 2019 tihchhuah a ni tawh

Mizoram sawrkar Excise & Narcotic Department in ‘The Mizo-ram Liquor (Prohibition) Rules, 2019’ an siam chu peih a ni tawh a, Mizoram sawrkar-in notification a chhuah hunah hman theih chauh a ni ang.

Excise & Narcotics Department-a Commissioner & Secretary, KT. Beicho IRAS chuan nimin khan ‘The Mizo-ram Liquor (Prohibition) Rules, 2019’ hrilhfiahna a siam a. The Mizoram Liquor Prohibition Rules 2019 hi 19th December, 2019 khan Mizoram sawrkarin Notification a chhuah a. Hei hi Official Gazette-a tarlan a nih hma chuan hman theih a nilo, a ti.

He Rules-ah hian Beer siamna (brewery) leh wine siamna (winery) te chu sawrkarin a rem tih chuan licence a pe thei a, Mizoram-ah hian Wine siamna leh Beer siamna, Sawrkarin tunhmaa phalna a lo pek tawh, tuna license thi tawh- Champhai & Hnahlan Grape Growers Society-te Wine siamna hmun (winery) leh Sakawrtuichhun-a Mizo Brewery (Beer siamna) te a awm a. Hun engemaw bikah, hun bithliah chhung atan Sawrkarin phalna a pekte hnenah a hmun huam tur chin bithliah siamin Mizo Zu siam thenkhat – Zufang, Zupui, etc te siama hralh theihna pek theih a ni ang. Hei hian tunhmaa sawrkarin a lo kal pui tawh thin angin Mizo Kut chi hrang hrang – Chapchar Kut, Pawl Kut, Anthurium Festival-ah te Mizo hnamin zu a neih te pholanna satliah a kawk deuh bik a. Excise & Narcotics Department-in zu a mansa te a dahthatna turin Zu dahna hmun bik Godown a siam thei dawn bawk a. State páwn lam atanga Zu lakluh leh zawrh erawh phal a ni lo a; phalna neite erawh chuan Excise & Narcotics Department atangin sapzu an lei thei thung ang.

Heng bakah hian Foreign ram hruaitu, ram khat palai, Foreign ram emaw India ram state dang atanga khualzin (tourist) leh mi pawimawh bikte, Mizoram chhunga Foreign mi hnathawka awm te, sipai bang leh an hriselna in a mamawh avanga doctor-in in tura a chawh bikte hnenah chuan hun ruat bik chhung atan zu in leh lei phalna bik (special permit) pek theih an ni ang a. Hriselna dinhmun vanga Permit neite pawh hian vantlang hmun, zirna In, Hotel leh mipui tamna hmunah Zu in phalsak an ni lo a, in tur zat chawh aia tam in phalsak an ni dawn lo bawk a ni.

Heng a chunga thil thenkhat phalna pek theih tura ruahmanna (provision) awmte hi a tul anga hman tangkai theih tura dah a ni a. Sawrkar-in heng dante hi a hmang kher ang tihna ni lovin a thuneihna hmanga a rel tur thil a nih thu a tarlang a. Mizoram chhungah Zu khapna Dan, The Mizoram Liquor (Prohibition) Act, 2019 chu khauh taka kalpui zel a nih thu leh Dan tesep thenkhat tarlante avangin Zu khuahkhirhna dan hi tih zangkhai emaw, tihnepna tur lam a kawk lo tih a tarlang bawk.