Champhai Police Station OC insawifiah turin hriattir

Kuhva ro tawlhruk chungchanga Vanram-chhuangi’n Gauhati High Court-a Public Interest Litigation (PIL) a thehluh kal zelah Champhai Police Station-a Officer-inCharge (OC) chu insawifiah tura tih a ni. 

Vanramchhuangi’n kuhva ro tawlhruk chungchanga PIL a thehluh hi May 17, 2024 khan Gauhati High Court, Division Bench, Chief Justice Vijay Bishnoi leh Justice Michael Zothankhuma thutna chuan ngaihtuahin January 22, 2024-a Kuhva ro tawlhruk chungchangah Petitioner leh Respondent te thu thelhluh (affidavit) atangin an hmuhdan chiang taka an tarlan tawh hnuah leh State sawrkar chu Petitioner FIR thehluh chungchanga chhuichianna (Investigation) thar kalpui tura a tih hnuah leh FIR thar pawh an register theih thu-a pek hnuah pawh Petitioner FIR chu register chhunzawm loh a la ni leh zel chu a lungawi thlak loh hle, a ti a ni.

Court thuchhuah chuan FIR thehluh chu register lovin Investigation Officer chuan a hmain CJM, Champhai-ah application thehlutin chhui phalna a dil a, chu application chu CJM, Cham-phai chuan January 7, 2022-ah a hnawl sak a, chumi hnuah January 22, 2024-ah High Court chuan Order a siam a, he Order a siam hnuah pawh CJM, Champhai ah tho chuan chhui phalna Police lam chuan an dil leh a, hei hi High Court chuan January 22, 2024-a an Order siam chu Officer incharge, Champhai chuan a zawm lo lui a tih bakah State sawrkar chuan he thil hi a ngai thu tak tawk lo a ni, a ti.

Court chuan Champhai Police Station OC chu hemi chungchanga insawifiahna thehlut a, petitioner Vanramchhuangi'n kum 2021-a FIR a thehluh chu tun thlenga register a nih loh chhan sawifiah turin a ti a. He PIL chungchang hi chawlhkar thum (3) hnuah ngaihtuah leh tur a ni dawn a ni.