Taxation Department-in kum 2023-2024 chhunga Chhiah an hmuh tura beisei vbc. 14 chuangin an khum

Mizoram sawrkar-a Taxation Department chuan kum 2023-24 chhung khan Chhiah chi hrang hrang cheng  vbc. 1,112.58 hmuin an target chu cheng vbc. 14 chuangin an khum a. Mizoram chhunga GST lo luhna lian tham tak pakhat chu sawrkar hnuaia Works Contract hna te a nih thu an sawi bawk.

Mizoram sawrkarin kum 2023-24 chhunga Taxation Department Revenue lakkhawm tura a bituk (BE) chu cheng vbc. 1,000.00 a ni a. Hei hi Revised Estimate (RE)-ah cheng vbc. 1,098.50-ah tihsan a ni a. Taxation Department hian an (RE) Target hi cheng vbc 14.08-a khumin chhiah an hmuh zawng zawng chu cheng vbc 1,112.58 a ni. Taxation Department-in chhiah an hmuhna langsar zualte hi GST-ah cheng vbc. 970.25, VAT-ah cheng vbc. 125.93 leh Profession Tax atangin cheng vbc. 16.37 te an ni a. Chhiah hmuhna zingah hian GST atangin revenue lut a sang ber a, Mizoram VAT hnuaiah hian GST hnuaia lut ve lo Petroleum Products hrang hrang atangin chhiah lak a ni bawk a. Profession Tax hi dan ang taka eizawnna neite hnen atangin an sum lakluh atanga lak thin a ni. Heng bakah hian GST hman a nih hmaa Entertainment Tax atanga chhiah ba lut Rs. 30,000 leh Firms & Societies registration fee Rs. 2,19,370.00 te a tel bawk a ni.

Zawhna chhangin Taxation Department thawktute chuan GST Collection Report hi chi hnihin sawifiah theih a nih thu leh Pakhatna ah chuan Mizoram chhunga Chhiah petuten an pek zawng zawng belhkhawm a ni tih an sawi a. Hetah hian IGST, CGST, SGST leh Cess te an ni a. Heng zingah hian Mizoram sawrkar chanpual chu SGST chauh hi a ni a, a bak zawng hi Central sawrkarah a lutkhawm a. He information hi GST portal-ah leh PIB website-ah hmuh turin a awm a ni.

Pahnihnaah chuan Mizoram sawrkar hnuaia Taxation department-in Mizoram sawrkara a chhunkhawm report a ni a. Hetah hian SGST leh Cross utilisation of IGST ITC leh Apportionment of IGST te an tel thung a. A pahnihna zawk hi Taxation Department-in thla tina Mizoram Finance Department hnena report a pek thin a ni, an ti.

Taxation-a thawktute chuan kum 2023-2024 chhunga an thawhchhuah a punna hi za zelah 9 (9%) a ni tih sawiin, Mizoram chhunga GST lo luhna lian tham tak pakhat chu sawrkar hnuaia Works Contract hnate hi an ni a. Tunhnai ah SASCI leh PMGSY hnuaia Works Contract thawhna Bill Contractor-te hnenah pek chhuah a tlem avangin GST Revenue Collection hi engemaw chen a nghawng a. Mahse hei hi chu contactor ten bill an lak huna rawn pung chho leh mai tur a ni a. A thla bi a kum kalta te nena khaikhin khian thla thenkhatah chuan kum kalta phak loh changte hi a awm ve fo thin a, hei hi India ram State dangte dinhmun pawh a ni a. GST Tax Revenue hi bungrua hralh leh service hralhna atanga lo lut anih miau avangin sumdawng ten an inhralh that leh that loh ah te, contractor ten bill an lak leh lak lovah te a innghat thuk em em niin an sawi bawk. 

Nikum (2023) January atanga April leh kumin (2024) January atanga April inkar ngaihtuahin kuminah hian sum hmuh a tlem zawk nia sawi chu sawifiahin Taxation Department thawktute chuan, kumin January atanga March inkarah khan kum danga chhiah an hmuhna thin tam takah bill pekchhuah a nih loh avangin an hmu tlem tih an sawi a. Chutih rual erawh chuan April thlaah erawh sumdawng ten an Account te chingfelin kum hmasa lama chhiah an chawi thin te an pek fel avangin kum dang aiin hemi thla bikah hi chuan an hmu tam tih an sawi a. April 2024 bikah hian cheng vbc. 131.68 lai an hmu tling niin an sawi bawk.

Comments

Popular News (Last 30 Days)

LPG man bithliah thar