Health Minister bang ngam turin MPYCC in an ti

Mizoram Pradesh Congress Youth Committee (MPYCC) chuan Health Minister Dr. R. Lalthangliana chu a hna chanpual a tlin ngang lo a nih chuan bang ngam mai se an ti.
MPYCC hian January ni 8, 2020 khan Principal Director, Health & Family Welfare Department chuan thu-chhuah siamin, Civil Hospital Blood Bank atanga thisen lakchhuah dan kalhmang tihdanglam a nih thu leh Civil Hospital Blood Bank atanga thisen la thinte tan Mizoram Sawrkarin kalphung thar, a hmaa ami ang lova a siam thu bakah Mimal emaw leh eng Hospital pawh Civil Hospital atanga thisen la turte chuan thisen an lakchhuah dawn reng rengin, Director, Hospital & Medical Education hnen atangin phalna lak zel tawh tur a ni tih an tarlang niin an sawi a.
Damlo thisen mamawhte tan liau liau a mi tlawmngaiten an thisen hlu tak an pek khawm sa a mamawhtute hnena pekchhuah dan tih danglam a nih chhan leh nunna chhan nana thisen pekkhawm sa hian damlo thliar hran bik leh Hospital thliar hran bik a nei em ni tih chu sawrkar zawtin, Emergency thil-a thisen mamawh rum rum te tan Director, Health & Medical Education hnena phalna lak hmasak zel ngai tura thuchhuah siam a ni chu mak an tih thu leh hriat-thiam har an tih thu an sawi a, Director, Hospital & Medical Education Office chu darkar 24 chhung an hawng mai dawn nge, chhun lam Office hun chhung chauhin thisen hi pek chhuah a ni dawn tih pawh an zawt a. ‘Emergency case avanga thisen mamawh, Director hnena phalna lak kual avanga khawtlaia nunna chante an awm palhin Sawrkarin mawh a phur ngam em? Chutianga nunna chan chu lo awm se sawrkarin mitthi chhungte lungawina tawk zangnadawmna a pe thei dawn em?’ tiin Mizoram sawrkar chu an zawt bawk.

Comments

Chhiar Hlawhte