Mizoram Police te Vote thlakna tura ngenna ECI in tum hnih a hnawl sak tawh

Election Department hotute chuan Lok Sabha Inthlanpui neih mekah Mizoram Police sang chuang State danga inthlan duty a chhuakte’n vote an thlak ve theihna tura ngenna an siam chu Election Commission of India-in vawi hnih a hnawl tawh niin an sawi.

Election Department hotute chuan State pawna inthlanna buaipui tura kal Mizoram Police-te'n vote an thlak theih vena atan hian an dilpui thu an sawi a, Election Commission hian an ngenna chu vawi hnih a hnawl sak tawh thu leh a chhan an hriat bik loh thu an sawi a ni.

Lok Sabha Inthlanpui neih mekah hian Mizoram Police mi 1,047-te chu Mizoram Lok Sabha Bial-a inthlan hma daih khan Duty tura tirhchhuah an ni a. Election Commission-in hun hmasa lama Postal Ballot hmanga vote thlak titawpa an puala Facilitation Centre-a vote thlak buatsaih tura tih an nih laiin Mizorama Candidate chinfel a nih hma a an Duty-na hmun pantir an nih avangin ruahmanna siamsak hman an ni lova. Hemi hi a chhan ni bera lang chu he lama mawh latu Ministry of Home Affairs-in Mizoram Chief Electoral Officer (CEO) Pisa kaltlang lova Home Department hnena lehkha an rawn thawn a, Home Department lamin hmanhmawh taka Police te hi an thawnchhuah vang a nih an rin thu an sawi a ni.

Hetianga Mizoram Police ten Lok Sabha Inthlanpui a Vote an thlak loh chungchang ah hian PC Party chuan Election Commission-a Principal Secretary SB. Joshi hnenah Inrinni khan lehkha an thehlut a. An lehkha thehluh ah hian State pawna Police duty-te'n vote tla chhiar hun, June ni 4 hma ngei a vote an thlak theihna tura ruahmanna siam turin an ngen a. Vote 1,047 hian Mizoram Lok Sabha bial inthlan result turah awmze thui tak a nei thei dawn nia tarlangin, Electronically Transmitted Postal Ballot System (ETPBS) hmanga vote an thlak theih reng lai a ruahmanna siamsak an ni lo chu hriatthiam har an tih thu an sawi a ni. 

April ni 19, 2024-a Mizoram Lok Sabha bial inthlanna-ah khan vote za zela 56.87 chauh a tla a. Tunhma lam inthlan lo awm tawh ngaihtuahin vote tla hi a tlem hle a ni.