Lenkawl

Disaster Management & Rehabilitation Department chuan Super Cyclonic Storm AMPHAN si per avangin Mizoram-ah ruahpui leh thlipui lo thleng thei tih sawiin, mipuite chu chi-ai lova inralring turin an hriattir.

Serchhip District chhunga COVID-19 vanga sawrkar in inkhunghranna a siam-a awm mek mi 2 te chu nimin khan chhuahtir leh niin mi-dang dahluh thar 2 an awm bawk a, heti hian sawrkar hmun siama khunghran mi 48 an la awm a ni. Hetihlai hian In lama khunghran pawh an inkhunghran hun zo te chu chhuahtir zel niin nimin-ah chhuah tir an awm avangin tuna In lama la inkhunghrang chu mi 2 chiah an awm tawh a. Heti hian Serchhip District puma inkhunghrang chu mi 50 an la ni.

Serchhip District Police te chuan nimin khan vantlang hmun-a Mask hmang lova chhuak mi 13 man lehin heng mite hi Serchhip-ah 8, Chhingchhip-ah 4 leh North Vanlaiphai-ah mi pakhat te an ni a, heng mite hi Rs. 100/- theuh chawitir niin The Mizoram (Containment and Prevention of COVID-19) Ordinance, 2020 bawhchhia dang erawh man an awmlo thung.

Rampum-a inkharkhip kalpui a nih hnuah Serchhip Bazar-a Sa man a danglam lutuk loh laiin Phai atanga lakluh Sangha man erawh nasa takin a pung thung.

COVID-19 kai pung chho zel

Nimin khan Chief Minister, Zoramthanga hovin CM Cabinet Meeting Room-ah Horticulture Department hotute chuan Department hmalakna te an thlirho.

Congress Thalai, Mizoram Pradesh Youth Congress Committee (MPYCC) chuan Airport Cute ber siam tumin Chief Minister a phar buai hle niin an sawi.

Mizo National Front (MNF) chuan Chief Minister leh Finance Minister thlak tul an ti lo tih an sawi.

Chief Minister, Zoramthanga chuan nimin khan a Department chan, Horticulture Department hnuaia Sairang-a Cold Chain Development hmalakna chu a hmunah a enfiah.

Mizoram chhunga District hrang hrang a COVID-19 damlote enkawlna tura ruahman, Dedicated Covid Health Centres (DCHC) te chu tunlai hian sawrkar laipui atanga rawn enfiah mek a ni.

Mizoram sawrkar in COVID-19 dona kawnga a din, Task Group on Quarantine Facilities-a Chairman, Esther Lalruatkimi chuan COVID-19 laka kan him tlan theihna tura Sawrkar hmalakna te tha taka an thlawp avangin Mipui, Kohhran leh VLTF/LLTF chungah lawmthu a sawi.

Congress Legislature Party (CLP) Leader, Zodintluanga chuan CLP Member ten tun thla (May, 2020)-a an hlawh chu a vaiin Chief Minister Relief Fund-ah nilo, COVID-19 dona atan Chief Minister hnenah an thehlut dawn tih sawiin, boruak a zira an chet zel tur thu a sawi bawk.

Chief Minister's Relief Fund hman dan tur ngaihtuah tura din, Committee on Utilisation of Chief Minister's Relief Fund for COVID-19 chu niminpiah khan thukhawmin CM's Relief Fund for COVID-19 atangin Rs. 30,20,000 chu hman-chhuah leh nise an ti. He Committee hian Lock-down avanga India ram hmun hrang hrangah Mizoram mi leh sa tangkhang in report an awm belh zel avang leh tunlaiin Mizoram a tangkhang te hruai haw tura hmalak mek a nih avangin Chief Minister’s Relief Fund atanga tanpui dilna te atangin Mizo Welfare hrang hrang 13 te hnenah tanpuina Rs. 28,20,000/- pek belh leh an rel a. Lawngtlai DC in a dilpui angin ramri veng-a duty Central Young Chakma Association te Rs. 2,00,000/- pek tura ruahman a ni bawk. Heti hian sum pekchhuah tawh chu Rs. 584,17,065/- a ni. Hetihlai hian COVID-19 do letna atana hman turin Chief Minister's Relief Fund-ah nimin thleng khan sum la luh belh zelin nimin thlenga sum lut hi cheng vbc. 7.73 a tling tawh bawk.

COVID-19 Medical Operational Team te chuan nimin khan an Chairman Dr. ZR Thiam-sanga MLA hovin Quarantine Management Unit Health and Family Welfare, Mizoram te nen Aizawl khawpui chhung a Quarantine Centre thlan bik- Synod Revival Camping Centre, Sihphir Neihbawih; ICFAI University Durtlang North leh SAI Hostel Mission Vengthlang te an tlawh a. Heng team hnih inkawp te hian Quarantine Facilities a awm theih leh theih loh te, Ministry of Home Affairs duh dan ang thil kalpui theih anih leh nih loh te, darkar 24 chhung Electric eng a awm that leh that loh te, tui thianghlim bakah hnianghnar a tui a awm theih dan tur te, khum ft. thum danah a awm theih leh theih loh te, khung hran ho tan a him leh him loh bakah ei leh in pek danah a him dan ber tur te leh Sample Collection tha taka tih theih anih leh nih loh te an enfiah a. MHA duh dan ang a thil kalpui zel a tul thu an sawi bawk.

Siaha District Bawrhsap, Bhupesh Chau-dhary IAS chuan nimin khan Siaha DC Conference Hall-ah 'Maraland Organic Chilli Powder' a tlangzarh a, he hunah hian Siaha DC chuan Zyhno tlangdung khua te hi Hmarcha thak tha chi tharchhuak hnem khua an nih thu leh Market a that vak loh avang leh a phorona khawl te a awm loh avangin kum khatah vawikhat chauh an tharchhuak thin tih sawiin, kuthnathawktute sum lakluh a pun theih nan leh kum khat-a vawi khat aia tharchhuah dan ngaihtuahin Chilli Powder Processing Plant din chu tih makmawha ngaia hmalak a nih thu a sawi bawk.

MPC Thalaite chuan Electric bill 50% tal a tihhniam turin Mizo-ram sawrkar chu an phut thu an sawi.

ZPM General Hqrs. chuan mipui thlamuantu tur Chief Minister kan mamawh niin an sawi.

Govt. Serchhip College Staff Welfare leh he College-a NSS Unit tangkawp chuan Adopted Village atana an thlan, Keitum khua ah nimin, May 19, 2020 khan luanchhuahna hun an hmang.

Mizoram Journalists' Association (MJA) chuan COVID-19 hrileng kaihhnawiha Press mite zalenna India sawrkarin a pek rahbeh tumna awm chu a duhloh thu leh tha a tih loh thu Mizoram Chief Secretary hnenah a thlen.

Serchhip District-a Police te chuan nimin khan vantlang hmun-a Mask hmanglo mi 12 man lehin heng mite hi Rs. 100/- theuh chawitir an ni a, an zinga tam ber hi Serchhip Bazar-a man niin Social Distancing zawmlo mi 2 man an ni bawk a, heng mite hi Serchhip Bazar-a man niin Rs. 200/- ve ve chawitir an ni bawk.