Lenkawl

Transport Minister, TJ. Lalnuntluanga chuan lirthei khalhtute, lirthei neitute leh mipui te chu lirthei kaihhnawiha sawrkar-in Dan a siamte chu zawm turin a chah.

Serchhip leh Thenzawl inkara Mat Lei dawh mek chu kumin July 31 khian zawh hman tura ruahman a ni.

Mizoram pumah nimin atang khan Road Safety Week vawi 31-na chu hman tan a ni a, he Hapta hawnna Serchhip-a neih tura ruahman chu tunlai-a hri leng, Covid-19 avangin thulh a ni thung.

Tunlaia Khawvelin a buaipui natna, Covid-19 laka kan ram, kan hnam kan lo him theih nan MHIP General Hqrs. chuan zanin dar 10:00 hian MHIP Member zawng zawngte ruala tawngtaina neih nise tiin, mahni awmhmun theuhah thahnem ngai taka tawngtai turin an member te an ngen bawk.

Mizoram Upa Pawl (MUP) Serchhip District chuan nimin khan Executive Meeting neiin tun thla ni 19-a Serchhip Auditorium-a General Assembly neih an tum chu tunhnaia hri leng avanga fimkhur thu ah leh sawrkar in mipui pun-khawm a khap bawk avangin sawn rih mai nise an ti a, a hun tur chu la ngaihtuah leh tur a ni ang.

Tun thla ni 27-a Serchhip-a Chapchar Kut hman tum chu hman theih a ni dawn ta lo a, Chap-char Kut hmanna tura sum ruahman tawh chu hun remchangah Cultural Meet emaw, Cultural Festival emaw hmanna atan dah a ni dawn.

Serchhip District Magistrate, H. Dolianbuaia chuan nimin, March 16, 2020 khan thupek tichhuakin nimin atang khan Serchhip District chhungah vantlang punkhawmna lam chi reng reng huaihawt khap a nih thu a tarlang.

Nimin khan Health Minister Dr. R. Lal-thangliana kaihhruaiin Health & Family Welfare Board Meeting chu Secretariat Conference Hall, MINECO-ah neih a ni.

Rubber Board-a Executive Director, Dr.K.N. Raghavan leh a thawhpuite chuan nimin khan Raj Bhavan-ah Governor, P.S. Sreedharan Pillai kawmin Mizoram chhunga Rubber chinna hmunhma zauh dan kawng sawiho a ni.

Health Minister, Dr. R. Lalthangliana chuan niminpiah khan Falkawn-a Zoram Medical College (ZMC) chu tlawhin Covid-19 laka inralrinna leh inven lawkna tura hmalakna hrang hrangte a enpui.

Chief Minister, Zoramthanga chuan nimin khan Bilkhawthlir khua tlawhin nakum-a YMA General Conference an thlenna tur leh Rest House sakna tur hmun hnih tlawh in a enfiah a, heng hmun pahnih te hi Architect leh Surveyor ten an teh nghal a. Chief Minister ho hian khawmpui thlenna tur Bilkhawthlir Field chu en ho bakah Bilkhawthlir Park cheibawl dan tur leh P&E Department ram leh Health Centre a en bawk.

MZP General Hqrs. hruaitute chuan Ram humhalh nana Bairabi Zophai-a Zofate Chawlhbuk sak tum a nih tirh atanga kawng hrang hranga an hmalakna leh sawrkarin hmalak tuma a insawina te chu a tak ram chang tawh se an duh thu sawiin, Mizoram sawrkar in a din, Core Committee chu an ring zo tawhlo tih an sawi.

Sawrkar laipui thu awiha Tripura Relief Camp atanga Mizoram a lokir Bru chhungkaw 1,900 chuang aiawhte chuan Tripura-a awm hlen turte dawn ang zat dawn ve an phut mek.

Mipuite ngenna siam

Coronavirus kai darh theih venthawn thuah Supply Department hnuaia Retailer, Electronic Point of Scale hmanga khawla Buhfai latu mipui ten kutzungpui thla an nem thin chu tun thla atan tihtawp a ni.

Chakma Autonomous District Council (CA-DC) hnuaia Village Council (VC) inthlanpui leh Lai Autonomous District Council (LADC) hnuaia Council Veng VC seat khat hnawhkhah nana by-election chu Zirtawpni khan tluang taka neih niin result kimchang pawh hriat theih a ni ta a.

Coronavirus leng mek chungchangah Inrinni khan Aizawl-a Health Directorate Conference Hall-ah Training of District Trainers on COVID-19 neih a ni.

India leh Myanmar inrina bul Siaha District Lopu lama Myanmar ram khaw hnai ber, Rali khua ah Zirtawp tlai khan India mi leh Myanmar mi an intibuai a, India mi 4 leh Myanmar mi 2 an hliam.

Irrigation & Water Resources Minister, C. Lalrinsanga hovin Zirtawpni khan Chief Engineer’s Committee Room, I&WR Office, Aizawl-ah National Hydrology Project leh Japan International Cooperation Agency (JICA) kaltlanga Mizoram tana hmalakna hrang hrang thlirhona neih a ni.

Serchhip Police te chuan nimin khan Serchhip khawpui chhunga hmun 5- Serchhip Bazar, P&E Veng, Serchhip Dinthar, IOC Veng leh New Serchhip-ah te Special Drive neiin dan bawh-chhia a lirthei khalh an awm leh awmloh an enfiah a, dan bawhchhia mi 12 m,an an ni. He hunah hian Marian H/S Serchhip-a Student Police Cadet (SPC) te pawh duty ve in Police te hnathawh dan hrang hrangte zirtir nghal an ni bawk.