Lungawilohna dawng tlem

Mihring phur chi lirthei chuanman sawrkar in a bituk zawm loh avanga mipui lungawilohna chu tunhnai thla ruk (6) kalta chhung khan sawrkar in pakhat chiah a dawng.

Mizoram Transport Department, Aizawl DTO-a Enforcement thuneitute chhinchhiah danin, kumin chhungin lirthei chuaman chungchanga lungawi lohna thlen theihna an hawn ah complain an dawng lo a, an dawn hnuhnung ber chu nikum December thla khan niin, hei hi tunhnai thla 6 chhunga complain an dawn awmchhun a ni a, Bus Fare kir duh lo avanga complain an dawn hi bawhzuiin thil tisualtu chu Rs. 500/- an chawitir tih an sawi.

Lirthei chuanman chungchangah mipuite chu phun lungawi mai lova an hnena report thin turin Enforcement thuneitute chuan an chah nawn a, chuanman aia sang la leh hemi kaihhnawih a harsatna nei tan Ph. No. 9862753656, 9862979014 leh 8974158183 bakah ziak leh Chaltlang a an Office-ah thlen theih a nih thu an sawi bawk.