ZORO in May 16-ah Peaceful Rally huaihawt tum

Zo Re-unification Organisation (ZORO) chuan tun thla ni 16 hian Zokhawthar leh Vaphai-ah India sawrkarin India leh Burma ramri hung a tum duhlohna leh Free Movement Regime (FMR) thiah a tum duhlohna lantir nan Peaceful Rally huaihawt an tum.

Nimin-a Aizawl Press Club-a thuthar thehdarhtute an kawmna ah ZORO hruaitute chuan Zofate chu an duh vang hi loin British awrkarin barhluih ramri a siamsak tih an sawi a. Insuihkhawma pumkhata awm leh an inbeisei laia ramri hung tuma hmalak a ni chu an hriatthiam loh thu an sawi a.  Zofate ram pathum- India, Burma leh Bangladesh-a an duh vang ni lova thendarh te chu hnam khat then hran an nih avangin India sawrkar chuan passport ngai loin ramri atanga KM 16 chhunga chengte Free Movement Regime hmanga intlawhpawhtawn a phalsak thu sawiin, hei hi India sawrkar chuan hnawk tiin thiah tumin hma a la tan mek tih ZORO hruaitute chuan an sawi a. FMR thiah a nih chuan unau thlahkhat thenhrana an awm dawn thu leh nupui pasal lo inneih pawlh tawh an nih anga kawppui then tur pawh thahnem tak an awm dawn thu an sawi a. FMR thiah a nih loh nan ZORO chuan hma a la chhunzawm zel dawn tih an sawi a. Peaceful Rally an neih tur chu thlawp tur leh telpui turin Mizoram mipuite an sawm a ni.

May 16, 2024-a FMR thiah leh Ramri hung duhlohna entir nan Peaceful Rally an huaihawt ni vek hian Nagaland-Myanmar ramri-ah leh Manipur-a Naga luah chin leh Zofate luah chinah Peaceful Rally hi neih bawk tur a ni tih ZORO hruaitute chuan an sawi a. “He ni-ah hian Mizoram (India) Myanmar ramri hrul khua zawng zawng te, FMR thiah leh ramri hung duh lohna hi lo zawm ve a, Peaceful Rally huaihawt theuh turin ZORO chuan a sawmin a ngen che u a ni,” an ti.