MIS Officer thar ten Champhai-ah Training an nei

Mizoram Information Service (MIS) Officer thar mi panga (5) te chuan District Information & Public Relations Office leh District inrelbawlna kawnga pawimawhte zirchiang turin nimin khan Champhai an thleng.

Mizoram Information Service 2024 batch mi 5, F. Lalrinfela, F. Zodingpuii, Biaknungi, Lalzara leh N. Vahneichhi te hian District Office Orientation Programme nei mekin kar hmasa lama Kolasib District an tlawh hnuah nimin khan Champhai thleng lehin tun thla ni 10 thleng khian Champhai District-ah training an nei dawn a. Nimin khan Champhai DRDO Project Director Lalrinawma leh Addl. SP Malmalsawma Hnamte te kawmin DRDO kalphungte leh thingtlang hmasawn nana Rural Development Scheme hrang hrang MGNREGA, PMAY-Gramin leh PMKSY kalpui dante hrilhfiah an ni a. Heng bakah hian Champhai District Police hmalakna leh security kaihhnawih pawimawhte hrilhfiah an ni bawk.

Hemi hnu hian Champhai-a I&PR Conference Hall-ah thuthar thehdarhtute nen inkawmna neiin Champhai DIPRO Dr. Lallawmkima chuan I&PR Department leh MJA Champhai District te'n sawrkar thuchhuah, mipui hriattur puanzar kawngah thawhhona tha tak an neih dante a tarlang a. MIS Officer tharte aiawhin Biaknungi, IPRO chuan thu a sawi bakah thuthar thehdarhtute aiawhin MJA Champhai District President Lalhlupuia chuan thu a sawi bawk a ni. Heng MIS Officer thar te hian ruahman lawk ang chuan tun thla tawp lam khian Lunglei District tlawhin training hi an nei chhunzawm leh dawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar