Khawzawl-ah Ruihhlo dona a hmalakna thlirho

Khawzawl District Narco Coordination Center (NCORD) chu nimin khan thukhawmin ruihhlo dona kawnga an hmalak mekna leh an hmalak zel dan tur an sawiho.

Khawzawl District Narco Coordination Center (NCORD) thutkhawm hi an Chairman leh District Bawrhsap K. Lalrohlua chuan kaihruaiin Khawzawl District chu ramri (International Border) hrula awm a nih angin, ruihhlo tawlhrukna kalkawng a nihna chen a awm a ni, a ti a. Hei vang hian Khawzawl District chhungah ruihtheihthil a hluar phah ni a a hriat thu a sawi bawk. Bawrhsap hian ruihhlo la ti ve lo te venhim chu ngaihpawimawh hmasakah neih a ngai tih sawiin, sawrkar, khawtlang, Kohhran leh tlawmngai pawl te chu an thlen chin theuhah ruihhlo tih chhin loh pawimawh zia uar taka zirtir zel turin a ngen nghal a ni.

He hunah hian Khawzawl SP Lalchhuanthanga chuan Khawzawl District Education Office (DEO) te nen inrawnin tun Financial Year (2023-24) chhunga hmalak dan tur ‘Campaign Calendar’ an ruahman fel tawh tih sawiin, Deputy SP (Hqrs.) R. Vanlalzawma chuan NCORD thutkhawm hmasa thurel bawhzuia Awareness Campaign neih tawh dan report a pe bawk a ni.

NCORD meeting hi thla tin neih thin a ni a, hmalakna te hi Narcotics Control Bureau (NCB) lamah report zel niin nimin-a thutkhawm ah hian Khawzawl District Hospital aiawh, District Child Protection Office aiawh, Education aiawh leh tlawmngai pawl hruaitute an tel a. Ruihhlo dona kawnga an hmalak zel dan tur relin, Kohhran tin te hnenah ruihhlo that loh zia sawi uar tura ngen te, Awarness Campaign huapzau zawk neih chhoh zel te a tel a ni.