MZP in MPSC chhuina an pawm lo tih an sawi

Mizo Zirlai Pawl (MZP) chuan Mizoram Public Service Commission (MPSC) hna lak dan chhui tura ruat I.O-in, ‘Thil fello a awm lo’ a ti chu mak an tih thu leh an pawm theih loh thu an sawi.

Nimin-a thuchhuah an siamah MZP General Hqrs. chuan Mizoram-a hna latu sang ber, MPSC hnuaia Mizoram Combined Competitive Examination leh Asst. Conservator of Forest (ACF) hna lakah thil diklo awm chungchangah MPSC Chairman chu mawhlaa bang tura an lo ngen tawh thu sawiin, MPSC hna lak dan chhui tura ruat I.O-in, ‘Thil fello a awm lo” tih a findings a ni chu mak an tih thu leh an pawm thei lo tih an sawi a. “MPSC hun rei tak lo enkawl tawhtu a nih avangin MPSC mualpho lohna turin thutlukna a siam ta mai em ni?” tih chu MZP zawhna a nih thu an sawi a. Inquiry Officer report chu MZP hi hriattir a la ni lo hrim hrim tih pawh sawiin, Chief Minister Press Conference atangin an hriat ve chauh thu leh Inquiry Report chu RTI hmanga dil mek a nih thu an sawi bawk a ni.

MZP thuchhuah chuan, “MPSC chhuitu hian ‘Tihsual an nei lo’ a tih avangin, MPSC hian Answer paper leh Mark tabulation-ah Correcting fluid duh duha hman an phal tihna a ni a. Mi thenkhat mark siamthatna Initial thlap thlap a nih laia, mi thenkhat Mark Correcting fluid hmanga tih that a ni bik chu MZP chuan thil fair takah a ngai thei lo a. Duhsak zawngte tih tlin theihna kawngka zau tak System MPSC-in a hmang hi a him lo takzet a ni,” an ti a. ACF hna lak, Exam vek tawh hnua Answer paper endik loh tur tih chu Inquiry Officer hian a chhui tel lo em ni tih pawh zawt nghalin, “Department Recruitment Rules ang ni loa Exam conduct-tu MPSC hian mawhphurhna lain, exam tawh hnu answer paper hi endik tlang ngei se a duh a. Thalai hna zawng mekte inbuatsaihna tithlawn lo se a duh a ni,” an ti bawk.

MPSC Chairman chhuakta JC. Ramthanga’n, “MPSC Chairman chu bang tura nawr chi a ni lo,” tih amah an thlahna ah a sawi chu a hun kal tawh enin awm an tih thu MZP chuan an sawi bawk a, “Addl. Chief Secretary a nih lai November, 2020 khan a makpa chu Covid chhuanlam in One Time Relaxation hmangin, Mizoram Engineering Service a thun tum tawhtu a ni a. MZP hmalakna avangin an ti tlang ta lo mai kha a ni. Tin, Chief Secretary nih a duh avangin a mah aia Senior zawk Chief Secretary ni theite nasa taka tibuai tawhtu a ni bawk,” an ti a. Mizoram Sawrkar chuan hun lo la kal zel turah eng dinhmun pawimawhah mah ruat nawn tawh lo se an duh tih an sawi a. “MZP chuan Inquiry Officer pakhatin thiam chantir mahse MPSC dik lohna chu a dik ta tihnaah a ngai lo a. MPSC dik tak a awm theih nan ngun takin a enzui zel dawn a ni,” an ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man