Ram neitu ten NH-302 siam hna thawktute an dan chu nimin khan tihtawp a ni ta

Lunglei leh Tlabung inkar NH-302 siam hna thawktute chu Land Owners’ Co-Ordination Committee on NH 302 (Lungsen & Rangte VC Area) inti ten niminpiah atanga an dan hnuah nimin chawhnu dar 2:00 atang khan dan pangngaiin hnathawktute chu hna an chhunzawm tir leh ta.

Land Owners’ Co-Ordination Committee on NH 302 (Lungsen & Rangte VC Area) te hian nimin khan thuchhuah siamin chhungkaw 30 chuang ten kawngpui tha duh vanga an ram phal taka an pek laia NHIDCL ten an ngaihsak lo thin chu rilru natthlak an tih thu leh hei vanga lungawilohna lantir ta an ni tih an sawi a. Hetihlai hian CALA Lunglei lamin theihtawp a hma an lak puina a zarah duhthusam chiah ni lo mahse beiseiawm thil an hmuh avanga hnathawktute an tihbuai tak loh thu an tarlang a. An beisei ang thil a awm lo anih chuan chet dan tur ngaihtuah nawn leh anih tur thu an sawi bawk a ni.

Hetihlai hian Lunglei District Magistrate chuan nimin khan thuchhuah siamin Lunglei leh Tlabung inkar NH-302 kawng zauh hna thawh mekah Lungsen leh Rangte Village Council te area chhunga ram a paltlang zingah zangnadawmna (compensation) la dawnglo an awm avanga kawngpui laih hna thawh mek chu chawlhsan tir tura hmalak tum a nih thu ah Sawrkar laipui hmalakna pawimawh tak kal mek chawlhtir tumna a awm chu District Administration chuan an ngai thutak hle tih nimin khan thuchhuah siamin an tarlang a. Ram neitu ten April 8, 2024-a Resolution an siam pawh April 15, 2024 khan Competent Authority for Land Acquisition (CALA) chuan ziaka chhangin, NH-302 kawngpui zauh hna kal mekin ram a tihchhiat tawh emaw, a tihchhiat tur ram neitu, tun thlenga zangnadawmna la dawnglo te'n a rang thei ang bera zangnadawmna an dawn turte an dawn theihna'na hma a lak dan te a hrilhfiah thu an tarlang a. Furpui thlen hma-a hnathawhna hun tlemte a la awm chhung hian hna tam thei ang ber thawk turin NHIDCL leh Contractor te pawh nawr mek an nih thu leh NHIDCL lam pawhin Estimate thehluh zawng zawngte chu a rang thei ang bera enfiaha, dikhlel lai te pawh CALA te nena sawiho zung zunga, Assessment leh Estimate te chu an hotu sang lama thehluh vat an intiam bawk tih an tarlang a. Hei vang hian NH-302 kawngpui zauh hna hi chawl lova a kal theihna'n Lungsen leh Rangte VC huamchhungah pawh compensation la dawnglo te ram tih lovah chuan he kawngpui siamthat hna hi chhumlo chat lovin a kal tur a ni tih an tarlang a, “He kawngpui siamthat hna kal mek tikhaihlak leh tibuai zawnga khawsa an awm a nih chuan an chungah dan angin hma lak a ni ang tih kan inhriattir nghal a ni,” an ti.

Comments

Popular News (Last 30 Days)

Vawiin-ah HSSLC Exam result

LPG man bithliah thar